Hitzargiak qu'ei un projècte qui a per tòca de favorizar la diversitat lingüistica europèa en recensant de practicas « innovantas, adaptadas, escadudas o exemplaras tà la comunautat que las a creadas e tà nombrosas autas comunautats lingüisticas o de parlants ». Que recensa, enter autas causas, la huelha de rota 2015-2019 tau desvolopament numeric occitan.
Hitzargiak qu'a per principi de basa que la coneishença de las bonas practicas e pòt aver efèits demultiplicators e que hicar experiéncias en comun, s'enteralimentar e collaborar a las iniciativas e permeterà de jónher l'apròchi globau e locau e d'ahortir tan las escadudas com lo movement internacionau.
Tad aquò har, que recensa las « bonas practicas » e que hica en contacte los organismes qui tribalhan a la revitalizacion de las lengas. En aqueth encastre, que presenta la huelha de rota miada peu Congrès en 2014 peu miei d'autas iniciativas tà l'aragonés, lo còrse, lo breton, lo galés, lo gaelic, lo mirandés, etc.
Hitzargiak qu'organiza tanben un encontre los 23 e 24 de junh a Orona Ideo. Los promotors de las lengas que s'i poderàn encontrar dens espacis d'amassada tà tots o taus petits grops, espacis tematics e participatius.