Letra de ligason :

Sélectionnez votre langue

Utís numerics

En seguida a la redaccion de la huelha de rota peu desvolopament numeric de l'occitan, Lo Congrès qu'estó retiengut tà dus projèctes màgers de desvolopament de las tecnologias : Linguatec e ROLF.

Linguatec qu'ei un programa pluriannau de desvolopament de las tecnologias de la lenga ta l'aragonés, lo basco e l'occitan. Que permetrà, mercés a ua cooperacion scientifica enter actors de las diferentas lengas, de crear utís qui hèn mestièr a cadun. Tà l'occitan que s'i parla de desvolopar l'analisi morfosintaxica, la traduccion automatica e la sintèsi vocau.

Linguatec qu'ei un partenariat transfronterèr (CNRS, Euskaltzaindia-Real Academia de la lengua vasca, Elhuyar, Universitat deu País Basco e Societat de Torisme deu Govèrn aragonés) finançat peus fons europèus tranfronterèrs (FEDER). Que l'an retiengut dens l'encastre de l'aperet a projèctes de la Comunautat de Tribalh deus Pirenèus, qui amassa las collectivitats e autonomias deus dus penents deus Pirenèus.

ROLF (Ressorsas utís tà las lengas de França) qu'a per objectiu la constitucion partatjada de ressorsas lingüisticas e de clavèrs predictius tà l'occitan, l'alsacian e lo picard. Que seràn realizats dens l'encastre d'un partenariat dab las universitats de Tolosa (laboratòri CLLE-ERSS), d'Amiens e d'Estrasborg.

Mercés aus estandards desvolopats (format, anotacion), que permetrà la publicacion d'un lexique flechit alinhat e d'un clavèr predectiu taus esmartfònes Android tà las tres lengas. Lo format e los utís desvolopats que's poderàn aplicar arron a autas lengas, en sarrant lo còst e lo temps de desvolopament d'aqueras ressorsas. Qu'ei finançat peu Ministèri de Cultura-DGLFLF dens l'encastre deu son aperet a projèctes « lenga e numeric ».

L'inscripcion de l'occitan en aquestes programas estructurants qu'ei ua escaduda qui balha ua perspectiva navèra de la huelha de rota. Los lors projèctes ambiciós de cooperacion scientifica e de transferiment de tecnologias enter las lengas desembocaràn a atrunas tà un public larg. Qu'ei tanben ua reconeishença deu tribalh deu Congrès e deus sons partenaris, dont l'Universitat de Tolosa-Joan Jaurès, en lo domeni deu tractament automatic deu lengatge (TAL).