Letra de ligason :

Sélectionnez votre langue

Bernat Lesfargues e Jòrgi Gròs

L'occitanisme ven de pèrdre dos escrivans, militants de longa data : Bernat Lesfargues e Jòrgi Gròs.

Bernat Lesfargues

L’escrivan, poèta, traductor tanben de literatura castelhana e catalana, es defuntat a 93 ans. Es considerat coma un dels darrièrs de la generacion dels escrivans occitans de la segonda mitat del sègle XX.

Viviá en Peiregòrd, ont èra nascut en 1924, a costat de Brageirac, après d’aver ensenhat lo castelhan a Lion. Aviá fondat las edicions Federop qu’editan d’autors de pertot dins lo monde mas tanben d’autors occitans de la generacion de Lesfargues.

Bernat Lesfargues escriviá en francés e en occitan.

Jòrgi Gròs

Escrivan, autor de romans e de contes (Lei bugadièras blavas, Contes de la garriga nauta al demest d’autras òbras) Jòrgi Gròs es tanben çò qu’apèlan un militant de la lenga occitana.

Nascut en 1922 a viscut a Nimes ont foguèt regent i es mòrt lo 16 de febrièr passat. Es, pels que coneisson l’occitanisme e son istòria, un personatge que se podiá pas mancar ; son engatjament èra exemplar. Se definissiá primièr coma un contaire e non pas coma un escrivan, qu’èra ça que la. 

Una escòla Calandreta pòrta son nom dins sa vila de Nimes.