... Se sèm pas mai que siam pas mens !
Vòts del President del Congrès permanent de la lenga occitana per 2019
Cars administrators, car conselhièrs,
Cars actors e usatgièrs del Congrès,
Car amics de la lenga nòstra.
Vos desirar la bona annada, far de vòts per l’occitan es pas de bon far aqueste an !
Lo Congrès ? Rai ! Lo Congrès a fach son prètzfach en 2018 e lo seguirà en 2019, mas lo ministèri de l’Educacion nacionala e los rectorats an amodat la regression de l’ensenhament de l’occitan, amb al nivèl nacional la reforma mortifèra del licèu e del bachelierat, e al nivèl dels rectorats una baissa brutala dels mejans. De corses d’occitan van èsser tampats alara que ne calriá dubrir ! L’ensenhament es l’afar de cadun. Cal organizar la mobilizacion de totes contra aquela liquidacion programada e lo mesprètz que benlèu la comanda. L’annada 2019, proclamada annada mondiala de las lengas per l'UNESCO, comença plan en França ! Quitarem pas de o dire !
Lo Congrès ? Rai ! Lo Congrès a fach son prètzfach en 2018, gràcias a totes los que trabalhan amb el e que teni a mercejar. A fargat e mes a disposicion d’utisses novèls. De mai en mai d’usatgièrs van sul site locongres.org qu’es vengut un vertadièr servici public de l’occitan amb 330 000 visitas en 2018. Lo Congrès, rai ! Son prètzfach o farà tanben en 2019. Podèm ja anonciar la mesa en linha ongan del conjugador per l’occitan de Provença, d’un corrector ortografic, del Basic, lexic francés occitan ortografic de referéncia que met en valor tot çò qu’es comun e mai espandit dins l’ensemble occitan mas tanben fa veire çò qu’es especific a las principalas varietats de lenga. Totes los occitans enfin se poiràn tornar conéisser dins lo meteis diccionari çò qu’es pas estat gaire lo cas dempuèi Piat e Mistral !
Per contra al nivèl nacional ! Es aquí lo picar de la dalha ! Res avança pas ! Tot recuola ! Nos amaguem pas la vertat, agachem-la francament e mobilizem nos al pus lèu totes amassa : 2018 es pas estada per la lenga nòstra una bona annada, qu’avèm pas vist cap de las promessas electoralas mesa en òbra. E ara 2019 comença plan mal !
La regression de l’ofèrta d’ensenhament de l’occitan-lenga d’òc es programada pel ministèri de l’Educacion nacionala amb sa reforma del licèu e del bachelierat e la baissa del mejans. Los rectorats, que lor es demandat d’estalviar, s’aprèstan a daissar barrar de corses de licèu e de collègis per de caps d’establiments a qual donan pas los mejans de los manténer. En mai, de rectors se permeton de far publicament de comentaris mespresants sus l’occitan.
Las convencions ? L’estat que n’es partenari se’n chauta. Pòdon pas èsser aplicadas amb la reforma e la demesida dels mejans. Lo còde de l’Educacion nimai la continuitat republicana son pas respectats !
Per l’ensenhament de l’occitan es la dobla pena, la dobla condemnacion. Los corses d’occitan qu’aurián pogut escapar a la condemnacion nacionala per la reforma auràn de mal a escapar a la condemnacion per la baissa dels mejans al nivèl rectoral.
Del costat de las Regions, las avançadas son estadas plan pichonas en 2018. Baste que ara lors reaccions e las de totes los elegits sián pro fòrtas e pro coordonadas per contribuir a arrestar lo chaple de l’ensenhament de nòstra lenga.
Al nom del Congrès, aplech comun dels actors e utilizaires de l’occitan, lanci una crida, un cridal per la mobilizacion de totes. Lo Congrès permanent de la lenga occitana i prendrà sa part.
Gilabèrt Mercadier, president del Congrès