Los 28 e 29 de novembre se tendràn doas jornadas a l’Ostal de Region de Tolosa a l’entorn de la tematica de la lenga pel desvolopament territorial amb fòrça intervenents màgers.

Son organizadas pel Congrès permanent de la lenga occitana, lo CIRDOC – Institut occitan de cultura e l’Ofici Public de la Lenga Occitana (OPLO) en partenariat amb la Region Occitània / Pirenèus-Mediterranèa.

Es un programa fòrça complèt que serà presentat als participants, mai que mai de conferéncias d’actors màgers de la toponimia (Bénédicte BOYRIE-FÉNIÉ, toponimista, Patrice POUJADE, professor de l’Universitat de Perpinhan o encara Philippe ABADIE, de l’IGN), de la sociolingüistica occitana (Jean-Yves AGARD, doctor en sociologia, Vincent RIVIÈRE del Congrès, o encara Carmen ALEN GARABATO, sociolingüista a l’Universitat de Montpelhièr) mas tanben de las collectivitats (Carole DELGA, presidenta de la Region Occitània Pirenèus Mediterranèa, o encara Magali BLÉNET, cargada de mission de la vila de Tolosa), o partenaris d’estructuras mai luènhas (La Chambra d’Òc de las valadas occitanas d’Itàlia, l’Ofici Public de la lenga bretona).

Per concretizar las avançadas realizadas en matèria de lenga pel desvolopament territorial, se signarà una convencion entre Lo Congrès permanent de la lenga occitana e l’Institut nacional de l’informacion geografica e forestièra (IGN) en preséncia de Carole DELGA lo dijaus 29 de novembre a 18h30.

Aquelas jornadas seràn tanben l’escasença de festejar la convivéncia e l’escambi d’experiéncias dins un encastre mai leugièr, amb un concèrt d’Anda-Lutz (de la Cie Guillaume Lopez), lo dissabte de ser.

Apassionats de toponimia, responsables associatius, de collectivitats e tanben d’entrepresas del país, sètz totes convidats a aquelas jornadas ricas en aprendissatges pel desvolopament del territòri occitan, manquetz pas de vos marcar al pus lèu a l’adreça seguenta : https://www.laregion.fr/toponymie1119

Trapatz l’integralitat del programa e dels participants sus la brocadura oficiala : Programa complèt