La posicion dels numerals cardenals rapòrt als adjectius que los completan.

« las prumièras tres annadas »

En occitan, al sens contra del francés, los numerals cardenals (« un », « dos », « tres », etc.) se botan a la seguida de l’indefinit « autre » e dels adjectius « prumièr » e « darrièr », - non pas davant. Ramon Chatbèrt ne fasiá la remarca dins son obratge Questions de lenga (Vent Terral, 1983) a prepaus de l’indefinit « autre ». E, entre autras citacions, prepausava aquela frasa de Bodon, tirada dels Contes del Drac : « Los autres tres, dempuèi lo matin desbosigavan la barta ».

Ajustava puèi : « Se diriá parivament : “los autres sièis”, “los autres dètz”, “los autres cent” ». Aquel trait de sintaxi fòrça important pr’amor que concernís un biais de dire quotidian, Chatbèrt fa remarcar qu’ Alibèrt lo nòta pas dins sa Gramatica occitana. E a ma coneissença nòta pas tanpauc lo fait qu’es la meteissa construccion que s’impausa ambe « prumièr » e « darrièr » seguits d’una indicacion de nombre.

Donc, coma disèm : « las autras tres annadas », direm : « las prumièras tres annadas » e « aquestas darrièras tres annadas ».

Joan-Pèire Tardiu

Fòto : Antony-22

En aliança amb