A de qué servisson los vèrbes semi-auxiliars ?

« Comencèt de cantar »

Lo ròtle dels vèrbes semi-auxiliars e de las perifrasas verbalas (cf. Los vèrbes semi-auxiliars 1) es de marcar una modalitat o un aspècte especific del procès verbal.

Las modalitats mai correntas son la possibilitat e la necessitat. La possibilitat se marca per l’emplec del semi-auxiliar « poder » (« Qu’ac poderà har ») e la necessitat per l’emplec del semi-auxiliar « dever » / « deure » (« Deves restar assetat »). Se pòt marcar tanben amb lo semi-auxiliar « caler » / « faler » o la perifrasa verbala « aver de » : « Me cal partir », « Auràs de clavar la pòrta ».

Los semi-auxiliars e las perifrasas verbalas servisson tanben a marcar l’aspècte, es a dire un moment de la realizacion del procès verbal, per exemple :
- lo començament de la realizacion : « Comencèt de cantar », « Se botèt a cantar »
- la realizacion en cors : « Es a passejar lo can »
- la fin de la realizacion : « A finit de picar lo tèxte »
Pòdon tanben marcar una particularitat del procès verbal, per exemple la repeticion : « Que’u torni léger »…

Maurici Romieu, vicepresident del Conselh lingüistic del Congrès

Bibliografia :

• Gramatica de l'occitan gascon contemporanèu de Romieu & Bianchi
• Dictionnaire grammatical de l'occitan moderne (parlers languedociens) de Florian Vernet

Fòto : Dennis Jarvis

En aliança amb