Los cases especific d'emplec dels auxiliars « èsser » e « aver »

« Qu’avèvan tribalhat com galerians »

Una categoria de vèrbes intransitius forma los tempses compausats amb l’auxiliar aver ; son los qu’an un sens imperfectiu (teoricament lo procès verbal es pas limitat) : « caminar », « córrer », « trabalhar », « viure » / « víver »… : « An caminat dapasset », « Qu’avèvan tribalhat com galerians ».

Los vèrbes mièg auxiliars « dever », « poder », « voler »… se pòdon emplegar coma de vèrbes autonòms o coma de vèrbes mièg auxiliars. Quand son emplegats coma de vèrbes autonòms, l’auxiliar dels tempses compausats es aver : « A pas pogut », « N’avè pas volut ».

Quand son emplegats coma mièg auxiliars (son seguits d’un infinitiu), la causida de l’auxiliar dels tempses compausats pòt èsser determinada :
- siá pel vèrbe mièg auxiliar : « Avián pas pogut anar pus luènh », « A volgut partir »
- sia pel vèrbe a l’infinitiu : « Èran pas poguts anar pus luènh » (cf « Èran pas anats... »), « Es volgut partir » (cf « Es partit »)

En occitan gascon, es puslèu la segonda construccion que s’emplega : « Qu’ei volut partir » (cf « Qu’ei partit »).

Maurici Romieu, vicepresident del Conselh lingüistic del Congrès

En aliança amb