Coma se marca la negacion amb los indefinits, e la negacion restrictiva ?
« N’avèva pas gahat nada lèbe »
Parlèrem ja de la negacion totala en occitan gascon. La negacion parciala pòrta sus un element de la proposicion. Generalament, los mots negatius s’emplegan amb la negacion « ne / non... pas » : « N’èi pas minjat arren », « Ne l’èi pas jamei / jamés vist ». La negacion restrictiva conten un element – « que / sonque » – qu’introdusís l’excepcion : « Ne minja pas sonque las hragas deu son casau ».
Los determinants indefinits – « nat, nada » ; « nulh, nulha » ; « cap » –, que marcan una quantitat negativa, s’emplegan amb la negacion completa : « N’avèva pas gahat nada lèbe »… Se lo determinant se tròba dins lo grop subjècte, la negacion presenta pas que lo primièr element : « Nulh testimòni non podèva balhar ua descripcion coerenta de l’accident ».
Los pronoms indefinits – « arren » ; « arrés » ; « degun / digun » ; « cap » ; « nat, nada » – que marcan una quantitat, foncionan tot parièr : « Que torna deu mercat mès n’a pas crompat arren », « Arren ne l’interessava au mercat », « Non l’auré pas hèit véder a degun », « Degun n’ac auré credut sens aquesta pròva ».
Andriu Bianchi, sòci del Conselh lingüistic del Congrès
Bibliografia :
- Gramatica occitana d'Alibèrt
- Gramatica de l'occitan gascon contemporanèu de Romieu & Bianchi
Fòto : Fmickan
En aliança amb 
