Quales son los comparatius en occitan ?

« Lo son ostau qu’es mei beròi que lo ton »

Se i a un vèrbe emplegat pels que presican un occitan blos e blos, es ben lo vèrbe « defugir » e naturalament, cal emplegar quicòm mai ! Alibèrt balha las « solas formas del comparatiu sintetic conservadas » : « melhor » (« bon »), « pièger » (« mal »), « màger » (« grand »), « mendre » (« petit ») e conselha de se daissar pas temptar per las formas analogicas (* « maja », * « pièja », * « mendra ») entendudas majoritàriament a l’oral e de se’n téner pels dos genres a las formas « màger », « pièger », « mendre ».

Òm pòt apondre « génser », « miélher » [occ.gasc.].

Los grads de comparason marcan la superioritat (1), l’inferioritat (2) e l’egalitat (3).
1- « plus | pus | mai… que » (lg.) ; « mei | mes... que » (g.) : « Soi mai polit que tu », « Lo son ostau qu’es mei beròi que lo ton ».
2- « mens… que » (lg.) : « Es mens aluserpit que sa sòrre », « Los joens que son mens pècs que los d’un còp èra ».
3- « tant… coma | (que) » (lg.) ; « autant | tant... com » (g.): « Es pas tan bèl coma vos », « N’es pas autan capborrut coma lo son pair ». N.B. Doblidetz pas de tirar la -t finala de « autant | tant » davant una vocala.

Per acabar, mençonam lo comparatiu generalizat per indicar lo grad mai naut o lo gra mai bas : « L’elefant seriá pas lo mai gròs dels animals », « Aqueth gus qu’es lo mens coratjós deu vilatge ».

Atencion quand l’adjectiu seguís un nom determinat per l’article definit : « La femna mai genta que coneguèri se maridèt amb un autre ».

Andriu Bianchi, sòci del Conselh lingüistic del Congrès

Bibliografia :

• Gramatica occitana d'Alibèrt
• Gramatica de l'occitan gascon contemporanèu de Romieu & Bianchi
• Diccionari ortografic, gramatical e morfologic de l'Occitan de Josiana Ubaud

Fòto : OHWiki

En aliança amb