Presentacion deu tèrm'Òc

Los lexics occitans qui estón publicats dinc adara qu’avón divèrsas escadudas e que's presentan uei lo dia dab mei d'ua forma : quantitativa dab o shens definicions, publicats devath format papèr o non, en linha o non…

Au temps qui èm, que sabem tres honts màgers per la terminologia occitana :

L'InÒc Aquitània que tribalha de las purmerias de las annadas 2000 enlà dens lo camp terminologic. Que produsí divèrsas realizacions :


L'Institut d'Estudis Occitans que publiquè quate lexicòts dab la fòrma de liberet :

  • las matematicas ;
  • l'informatica ;
  • la biologia ;
  • la telefonia mobila.


Lo Termcat – centre de terminologia catalana, que publiquè en partenariat dab lo Grop de lingüistica occitana (organe assessor de la Generalitat de Catalonha tà la creacion d'un traductor automatic en linha) un lexic « Societat de l'informacion. Novèlas tecnologias e internet ». Aqueste lexic, qui a un còrpus en francés, castelhan, catalan e anglés, qu'ei accessible en linha.


Totun, que i a un sarròt de lexics hargats per afranquidas o personas e qui estón realizats segon las oportunitats, los centres d'interès o las competèncias deus autors. Malaja aquestes que son esbarrisclats e lo public ne'us coneishen pas guaire.

Per'mor d'aquera eterogeneïtat e de la dispersion de l'informacion, que hasè necèra de valorizar çò qui existiva en hant compte de las caracteristicas tecnicas e politicas que la terminologia occitana e i a trucas d'encontrar tà un aviéner pròche.

Tà amiar tà davant aquest prètzhèit, Lo Congrès permanent de la lenga occitana qu'a aviat ua aliança dab l'InÒc Aquitània dens l'encastre de la mission prioritàrai « socializacion de la lenga occitana en Aquitània » de l'operator regionau aquitan. L'InÒc Aquitània qu'ei d'ara endavant depositari de divèrs lexics, que recèp demandas de collectivitats dont la Region Aquitània e lo Conselh generau deus Pirenèus Atlantics, e que vòu entinoar un aviéner interregionau, e lhèu « panoccitan » d'aquera activitat.

Per'mor de las soas divèrsas alianças (Termcat, Société française de terminologie, Ofis ar Brezhoneg), l'Inòc Aquitània qu'a un nivèu haut d'expertisa en tractament terminologic. L'aliança enter Lo Congrès e l'InÒc Aquitània que's desvolopa sus quate èishs :

  • Dar accessibles cada lexic mercés a notícias publicadas suu site deu Congrès : aquestas que son normadas entà aver ua presentacion comuna per cada hont (autor, annada, operator, varianta(s) tractada(s), lengas, descripcion) e un accès quin que sia lo format.
  • Integrar los lexics, segon las disponibiltats deus drets, dens ua sola basa de dadas publicadas sus internet e accessible mercés a un motor de recèrca. Aquera etapa qu'impliquè ua mesa en coeréncia capsús d'aqueths lexics (format, còrpus, tractament de las variantas, etc.).
  • Desvolopar ua solucion aplicativa entà gerir aquera basa de dadas interactiva e balhar la possibilitat a d'autes operators d'aumentar los lexics qui existeishen, en tèrmis mes tanben en variantas tractadas.
  • Per’mor de la necèra d’eficacitat e entà lhevar l’interès deu public e de valorizar los camps lexicaus investits, qu’ei pensat mesas en situacion en format audio o video deus tèrmis suu site internet de l'lnÒc Aquitània entà concretizar e har pertinentas las causidas.

Lo tèrm'Òc qu'ei ua coproduccion deu Congrès permanent de la lenga occitana e de l'InÒc Aquitània.

Tots los drets reservats.