Euroregion Aquitània-Euskadi, constitucion d'un còrpus de tèxtes occitans

Còrpus occitan

Elhuyar qu'ei ua fondacion basada en Euskadi (Espanha) especializada tau tractament numeric de la ressorças lingüiticas. Qu'a quasi 80 emplegats e qu'ei ua referéncia en tèrmi d'utís especializats (traduccion automatica, desvolopament d'aplicacions multiplatafòrmas). Que tribalha dab mantuns operators publics o privats (mèdias, universitats, administracions, etc.). Lo Congrès e Elhuyar qu'avièn en 2012 ua collaboracion e que despausèn un dossièr de subvencion dens l'encastre de l'aperet a projècte de l'Euroregion Aquitània-Euskadi tà la creacion d'un diccionari basco-occitan e la constitucion d'un còrpus de tèxtes occitans.

Aqueth projècte de diccionari qu'a l'interès de har comunicar las duas lengas dirèctament, shens utilizar lo francés o castelhan, e de har profieitar au Congrès de l'experiéncia e de la hauta tecnicitat d'Elhuyar, per exemple dab la creacion d'un còrpus de tèxtes occitans. La lexicografia occitana qu'avè gran retard tà aqueth maine e que calè har rampèu e desvolopar los utís de traduccion automatica per exemple.

La collaboracion enter Lo Congrès e Elhuyar que s'esplandeish sus 3 ans. Lo projècte que perpausa la creacion deu diccionari basco-occitan en utilizant los metòdes automatics de la lenga, dab ua revision manuau. Mei precisament, lo metòde perpausat qu'ei lo de la creacion de diccionaris per « pivòt », qu'ei a díser crear lo diccionari basco-occitan en emplegant un diccionari basco-francés e un diccionari francés-occitan. Pr'aquò aqueth har que'u hè mestièr d'autas ressorças (autes diccionaris, còrpus de las duas lengas tà l'eliminacion de suberproduccion de mots, utís de tractament automatic de la lenga, etc.) qui son a crear sustot tà l'occitan.

Elhuyar que s'encargarà de la partida basca deu projècte (diccionari basco-francés e còrpus de tèxtes) e la numerizacion deu còrpus occitan. Lo Congrès que selecciona e que horneish lo còrpus occitan e lo diccionari francés-occitan.

Los còrpus occitans que son bastits mercés a ua aliança dab la societat Vistedit (archius deu jornau La Setmana), l'escòla Gaston Fèbus (archius de la revista Reclams) e lo site d'informacion en linha jornalet.com.

Elhuyar : www.elhuyar.org
Euroregion Aquitània-Euskadi : www.aquitaine-euskadi.eu
La Setmana : http://lasetmana.fr
Reclams : www.reclams.org
Lo Jornalet : www.jornalet.com