Lo Congrès al datachallenge d'IA Pau

Datachallenge d'IA Pau

Lo Congrès prepausarà un desfís als estudiants que participaràn al datachallenge d'IA Pau, un eveniment a l'entorn de l'intelligéncia artificiala que se debanarà del 4 al 6 de decembre. Lor demandarà de desvolopar un analisator morfosintaxic per l'occitan.

IA Pau es un eveniment annadièr qu'acampa d'actors del machine learning e de l'intelligéncia artificiala. De costuma, se debana a Pau mas ongan, se fa en version numerica. L'eveniment prepausa un datachallenge, es a dire un desfís pausat a de desvolopaires.

D'estudiants en informatica constituiràn d'equipas e ensajaràn, mercés a l'intelligéncia artificiala, de respondre a de problematicas pausadas per d'entrepresas. Lo Congrès a prepausat un subjècte dins lo camp del tractament automatic de la lenga (TAL).

Demandarà als participants de bastir un analisator morfosintaxic (PoS-tagger), es a dire un otís qu'indica automaticament, per cada mot d'una frasa, quala es sa categoria grammaticala. Un tal otís permetriá, entre autras causas, de melhorar la sintèsi vocala o d'ajustar al dicod'Òc la possibilitat de veire un mot utilizat en contèxte.