Omenatge a Bernard Moulin

Bernat Molin

Amb grèva pena e una prigonda tristor vos fasèm part del decès de Bernard Moulin, vicepresident del Conselh lingüistic del Congrès permanent de la lenga occitana.

Perdèm un companh dins lo trabalh que sa competéncia e son eficacitat avián pas d’egalas que sa modestia e sa discrecion. Perdèm tanben un amic dins la vida que podiam totjorn saber fisable e segur a cada pas del camin.

Bernard èra matematician. Agregat de matematicas (1971) e doctor en matematicas (1977). Son especialitat èra la teoria dels grafes que me n’ensenhèt las abeçaròlas a la primièira universitat occitana d’estiu de Montpelhièr en 1972. Per amor de la lenga occitana s’èra tanben fach lingüista e portèt a sos estudis de la lenga la rigor de sa disciplina de formacion. Bernard viviá en Provença ont èra un actor màger de l’occitanisme dins la Region. Lingüista e practician total de la lenga occitana, Bernard desseparava pas la coneissença de la transmission, ni la descripcion de la regulacion. Totes coneissèm e avèm a posita la gramatica provençala que n’es el l’autor amb Guiu Martin, e ont las mapas descriptivas de la realitat dialectala provençala tradicionala acompanhan e sostenon la gramatica d’usatge (Grammaire provençale 1983, 1998, 2007). Tanben lo diccionari que nos porgiguèt amb lo meteis Guiu Martin es enriquesit, assoplit e assegurat per l’intuicion nativa d’Elias Lèbre, locutor non lingüista qu’associèron a lor entrepresa (Diccionari de basa 1992, 2004). Mai recentament, en 2006, devèm a Bernard una gramatica descriptiva de l’occitan de son caire de naissença, de l’autra man de Ròse dins lo sud de Vivarés (Grammaire occitane : le parler bas-vivarois de la région d'Aubenas). Las reedicions, resseguidas e aumentadas, tant de la Gramatica provençala coma del Diccionari, atèstan de la qualitat e de la pertinéncia dels obratges. Tot recentament, dins lo mes de març qu’acabam, Bernard nos anoncièt la finalizacion de la varianta provençala del conjugador occitan en linha sul sit del Congrès.

A Bernard Moulin, los membres del Conselh lingüistic coma lo Congrès permanent dins son ensem volèm dire la nòstra gratitud per sa contribucion a la coneissença e la vida de la lenga. Al nom del Conselh e del Congrès e mai dins mon nom personal vòli saludar l’amic defuntat e assegurar totes sos parents e tenents que compartissèm lor dòl.

Patric Sauzet, President del Conselh lingüistic

Maurici Romieu, Vicepresident

Arvèi Lieutard, Secretari

Cecila Chapduèlh e Rafèu Sichel-Bazin, membres del burèu

Gilabèrt Mercadièr, President del Congrès permanent de la lenga occitana

 (Fòto Teiric Hours)