Presentacion publica de Votz, purmèra sintèsi vocau en occitan

Votz, sintèsi vocau en occitan

Aqueste dimars 23 de heurèr de 15h enlà que’s tienó a Pau - e retransmetuda en linha tanben - la presentacion publica de Votz (votz.eu), la purmèra sintèsi vocau en occitan (gascon e lengadocian).

La sintèsi vocau qu'ei l'utís qui permet a l'ordenador de transformar tèxte escriut en votz. Que l'utilizan los GPS, los transpòrts en comun, los assistents vocaus, los logiciaus de lectura a l'ecran deu monde uelhfebles e òrbs... Tots que son enjòcs màgers tà la lenga occitana, notadament tà la soa preséncia dens lo maine numeric, e la socializacion de la lenga capvath l’espaci public.

Aqueste projècte qu’estó hèit mercés au consòrci transfronterèr Linguatec, qui amassa acadèmias, universitats, centres de recèrca e institucions tau desvolopament de las tecnologias entà l’aragonés, lo basco e l’occitan, dab lo sostien deu fons europèu Poctefa.

Qu’ei hargada Votz dab las darrèras tecnologias, a saber la deus hialats neuronaus (intelligéncia artificiau) desvolopada peu noste sòci Elhuyar. Lo seguit scientific e lo metòde seguit qu’estón d’aulhors premiats per la publicacion d’un article scientific a LREC (Language Resources Evaluation Conference), la conferéncia internacionau màger en tèrmis d’avaloracion de las tecnologias deu lengatge.

L’equipa deu projècte que presentarà aquera tecnologia tà las duas varietats pirenencas de l’occitan (gascon e lengadocian) e que lo public e poderà utilizar mercés a Votz (votz.eu), ua platafòrma en linha. Tanben que’s hiquèn en lutz totas las aplicacions concretas e mei tecnicas qui se’n pòt har ad aquera escadença.

Entaus qui n’averén pas podut seguir lo Facebook live, aquiu la redifusion au noste canau Youtube :