Sòcis navèths e antena navèra : Lo Congrès que pren endom

Lo Congrès que pren endom

Arron lo convencionament dab l’Ofici public de la lenga occitana (OPLO) d’aqueste mes de junh passat, lo Conselh d’administracion deu Congrès qu'a dus sòcis navèths :

  • Novelum : qu’ei ua associacion lei de 1901. Qu’ei la seccion perigordina de l'Institut d'Estudis Occitans. Qu’a per mira la promocion e la coneishença de la cultura occitana, e tanben la practica de l'occitan, qui hè partida cap e tot deu patrimòni culturau noste. La soa activitat que’s centra mei que mei en Peiregòrd, mes que’s pòt esténer quauque còp mei enlà, en collaboracion dab las autas seccions de l'IEO, e partenaris autes.

 

  • L’Ostal del Telh : A Orlhac (Cantal), qu’ei un lòc de ressorsas e d’encontres a l’entorn de la lenga e de la cultura occitanas.

L’Ostal del Telh qu’ei tanben ua libreria multimèdia, ua sala de reunion equipada, un lòc de repeticions artisticas, d’espectacles de pagèra modèsta, ua mediatèca fisica e numerica, un centre de formacion professionau. Mes tanben burèus associatius, cors de lenga e talhèrs de cosina, un centre d’animacions, mustras, un quadre de tribalh per las personas e los organismes qui òbran entà la cultura occitana, ua possibilitat d’un tribalh collaboratiu e un lòc on se pòden trobar conselhs, e har encontres.

L’un deus objectius de l’Ostal del Telh qu’ei de hicar endavant las practicas culturaus e artisticas constitutivas deus territòris nostes : canta, conte, musica, dança, literatura, etc. Que vòu autanplan favorizar los encontres enter lo public e los actors de la cultura occitana (artistas, associacions, Calandretas,...) dab un esperit de partatge e d’ubertura.

 

Que profieitèm d’aqueth parat entà obrir ua antena deu Congrès a l’Ostal del Telh, dab la mira de ns’associar a la dinamica a l’entorn d’aqueth hialat d’actors en Cantal e en region Auvèrnhe-Ròse-Aups. Aqueth punt d’ancoratge navèth qu’ahorteish un drin mei la filosofia deu Congrès de desvolopar los utís sons entà totas las varietats de l’occitan.