Letra de ligason :

ReVOc en chifras : mei de 200 òras alinhadas en occitan !

ReVOc : + 200 h !

Aviat en 2019, lo projècte ReVOc de la purmèra reconeishença vocau en occitan que prava, e qu’ei possible sonque mercés a la contribucion de tots los actors qui s’i hèn entà mutualizar las loas dadas lingüisticas dens l’amira d’un projècte comun.

La hrèita grana de còrpus audio e escriuts alinhats que hasó entrar lo Congrès dens ua dinamica de convencionament dab tots los actors de l’occitan mes, a maugrat deus còrpus atau obtienguts, non permetèva pas d’aténher lo nombre d’òras necessari entà hargar l’utís de reconeishença vocau, a saber 200 òras per lenga (e donc per varietat, dens lo cas de l’occitan).

Qu’ei atau qui gessí l’idea d’apitar ua platafòrma contributiva per tota la comunautat occitanofòna (la de Mozilla, Common Voice, ne sap pas gerir la multivarietat intèrna d’ua lenga). Arron la soa aviada oficiau lo 8 de deceme passat, qu’èm urós de v’anónciar que la platafòrma ReVOc qu’a, en mensh d’un an, passat las 87 òras de contribucion, dont environ 50 h en occitan gascon, 37 h en occitan lengadocian, e environ mieja òra entà las autas varietats.

En hornir aquera contribucion bèra aus còrpus de tots los actors de l’occitan, que n’èm uei lo dia a environ :

  • 105 òras alinhadas en occitan gascon,
  • 105 de mei en occitan lengadocian,
  • e environ 2 òras de mei entà totas las autas varietats.

Si las varietats pertocadas peu projècte (l’occitan gascon e lengadocian) be’n son representadas, lo Congrès que volèva a l’encòp profieitar deu programa entà perpausar l’utís contributiu a totas las varietats de l’occitan, entà melhorar la loa preséncia numerica.

Las etapas seguentas ara que son de :

  • Desvolopar los còrpus escriuts (monolingües occitans e/o plurilingües) entau modèle lingüistic : la literatura scientifica que recomanda de dispausar d’environ 500 milions de mots d’ua lenga/varietat. Que n’èm peu moment a 6 milions en occitan dont environ 3,5 milions en occitan lengadocian e 2,5 en occitan gascon.
  • Desvolopar los partenariats dab totas las estructuras qui ac vòlen entà ahortir la loa preséncia numerica dens la lor varietat.

Totas las volentats que’n son planviengudas, e mei d’un contacte qu’ei ja entinoat dab mantua estructura en aqueth sens. Que hè hrèita diversitat, varietat (de lenga, d’atge, de qualitat sonòra, etc.), mes sustot : quantitat.

Que tienem totun a mercejar ja aus partenaris convencionats : maisons d’edicions, jornaus, productors audiovisuaus, ràdios, institucions occitanas, mes tanben associacions e particulars que son estats nombrós a har còrda en aquera enterpresa, shens qui arren non seré pas estat possible.

Que mercejam sustot a tots los particulars qui contribuín e qui contunhan d’ac har a la platafòrma de casa estant, mes de l’escòla estant tanben (dab ReVOc Classas), e que ns’estam a la disposicion de tot cadun qui’s volha juntar ad aquera mutualizacion de las ressorsas entà bastir los utís numerics qualitatius en occitan de doman.