100 000 visitas tau site deu Congrès

Lo Congrès

Lo site deu Congrès, www.locongres.org, que passè en seteme lo cap de las 100 000 visitas despuish la soa aviada lo 28 de noveme de 2012. En dètz mes d'espleitacion, qu'ei ua escaduda de las bèras qui amuisha qu'aqueth site e hasè hrèita au public.

L'aplicacion la mei utilizada - n'ei pas ua suspresa ! - qu'ei lo dicod'Òc. Lo conjugador automatic occitan verb'Òc, per estar joen, qu'arriba dejà segond.

Dab lo desvolopament aqueste estiu de las aplicacions taus telefonets, que's coneish tanben un creish de connexion deus mobils ençà. L'equipa e los sòcis deu Congrès que son dejà a s'i har tà hargar utís navèths.

Lo Congrès qu'ei gessit d'ua afranquida istorica qui amassa las federacions istoricas, las institucions e collectivitats occitanas de tres Estats de l'Union Europèa entà bastir un organisme occitan de regulacion lingüistica. Mercés a tots, que s'ei podut bastir locongres.org, vertadièra CUMÒC (« cooperativa de mutualizacion de materiau occitan ») qui hica a disposicion e qui basteish utís lingüistics tà respóner aus besonhs deus locutors e deus usatgèrs de l'occitan.

Que sian remerciats tots los contributors institucionaus, associatius e individuaus qui an permetut l'escaduda d'aqueth projècte . Mercés ad eths, a la gratuitat deus servicis, a l'usatge privilegiat de formats e de licéncias libras e a l'universalitat d'accès (site multiplatafòrmas), locongres.org qu'ei vadut un servici public numeric e collaboratiu de la lenga occitana.