Lo Congrès a l'iniciativa d'un plan de desvolopament digitau tà l'occitan

Plan de desvolopament digitau tà l'occitan

Lo Congrès, dab lo sostien de l'ADEPFO (Associacion de desvolopament deus Pirenèus per la formacion), qu'a decidit de miar ua afranquida inedita arron l'estrategia numerica tà l'occitan. Lo prètzhèit qu'ei d'aviar ua reflexion collectiva arron un plan de desvolopament digitau tà l'occitan.

De la soa creacion enlà, Lo Congrès que desvolopa utís numerics tà la lenga. Uei, mei anar mei, l'occitan que s'esplandeish sus Internet o dens lo maine numeric. Totun la lenga que pateish un retard màger dens uns maines com los jòcs, la sintèsi vocau, lo web semantic o las telecomunicacions. Aquestes que son enjòcs géncers, sustot tà las navèras generacions a qui avem de transméter la lenga.

Tà's har mei endavant, Lo Congrès qu'a aviat un procèssus qui amassa actors, institucions, collectivitats e poders publics. L'objectiu qu'ei, a partir d'un diagnostic partatjat, d'eloborar ua estrategia collectiva e un metòde d'accion. Un vintenat de personas representativas de l'usatge sociau de la lenga occitana qu'i participan.

Lo dispositiu qu'a un Comitat de pilotatge, presidit per Dàvid Grosclaude (Conselhèr regionau d'Aquitània encargat de las lengas regionaus e administrator de l'ADEPFO), qu'amassa representants deu Ministèri de la Cultura – DGLFLF e de las collectivitats qui sostienen Lo Congrès. Un organisme de formacion, Media.kom, e ua estructura de supòrt tecnic qu'acompanhan los estagiaris dinc a la fin de l'an. Que seràn tanben estudiats autes contèxtes lingüistics (basco, catalan, breton e galés).

L'idea qu'ei, a tèrmi, la creacion d'un repertòri deus utís e de las ressorsas lingüistics qui existeishen, l'indentificacion deus qui hèn besonh e la redaccion d'ua huelha de rota 2014-2015 tà'us desvoloppar.