Lo Congrès que hasó la soa Amassada Generau

Amassada Generau deu Congrès

L'Amassada Generau Ordinària deu Congrès permanent de la lenga occitana que s'amassè lo 21 de mai de 2014 a l'Ostal d'Occitània a Tolosa. Devath la presidéncia de Gilabèrt Mercadièr, los sòcis que hasón lo bilanç formau de 2013 e qu'escambièn suu programa d'accion tà 2014.

Après un an d'espleitacion, la frequentacion deu site internet deu Congrès - locongres.org - qu'ei de las bonas, dab 135 000 visitas, dont 67 000 visitaires unics. Qu'ei de notar qu'aqueras visitas e son qualitadosas : lo taus d'arrebomb (27%) e la durada mejana de visita (9 min 30) que ns'ensenhan que lo contiengut deu site e respon a las espèras deus usatgèrs.

2013 qu'estó tanben l'annada de la constitucion deu Conselh deus usatgèrs, organe assessor deu Congrès qui representa la demanda sociau (ensenhament, edicion, mèdias, creacion contemporanèa, etc.). Lo burèu deu Conselh deus usatgèrs qu'estó elejut e Patrici Baccou, director deu centre APRENE, que n'ei lo president.

Tà 2014, projèctes que n'i a. La navèra version deu site deu Congrès que hicarà en linha en junh los tribalhs miats peus Conselhèrs lingüistics e los lexicografes deu Congrès : tablèus qui ensenhan la relacion grafia-fonia, ua version provisòria deu Basic (lexic elementari francés - occitan), lexic de l'istòria-geografia (comun gascon e lengadocian).

Que serà en linha  tanben un dicod'Òc « 2.0 », dab diccionaris occitan-francés atau com ua part « diccionaris istorics » qui amassarà lo Tresor dóu Felibrige e lo Dictionnaire du béarnais et du gascon moderne de Simin Palay. Que i aurà tanben un forum en linha tà que lo Conselh deus usatgèrs e posca escambiar e har pujar los besonhs.

Enfin, dinc a la fin de l'annada, lo Congrès que miarà dab lo sostien de l'ADEPFO (Associacion de Desvolopament deus Pirenèus tà la Formacion) ua estudi-accion arron la question de l'estrategia numerica tà l'occitan. Un diagnostic de çò qui existeish en ressorsas numericas e un esquèma de desvolopament 2014-2020 que seràn presentats oficiaument au mes de noveme.