Amassada generau deu Congrès

Amassada generau deu Congrès

L'Amassada generau deu Congrès permanent de la lenga occitana que's debanè lo 6 de mai a Tolosa. Qu'estó lo parat tà Gilabèrt Mercadièr, President deu Congrès, de tornar sus un an 2014 deus rics tà l'organisme de regulacion de l'occitan.

Aquera annada que vedó la creacion de la navèra version deu portau locongres.org, d'ua navèra version deu dicod'Òc qui perpausa d'ara enlà quinze diccionaris en tres partidas (francés-occitan, occitan-francés, istoric), de la navèra aplicacion express'Òc, la publicacion, après un tribalh de tres ans devath la direccion scientifica de Maurici Romieu, vicepresident deu Conselh lingüistic, deu Basic - lexic referenciau e ortografic francés-occitan (comun gascon-lengadocian tà començar), l'obertura d'ua partida « Nòrmas e òbras normativas », etc.

Dab aqueras nautats la frequentacion deu site qu'avó un creish de 37 % au par de 2013, dab 184 000 visitas e 85 000 visitors unics.

2014 qu'estó tanben mercada peus tribalhs que mièn tà la redaccion de la Huelha de rota 2015-2019 tau desvolopament numeric de l'occitan. Tad aqueth projècte géncer, hèit dab l'ajuda de l'ADEPFO, un vintenat d'estagiaris representatius de l'usatge e de la transmission de la lenga occitana (ensenhament, formacion professionau, mèdias, institucions, etc.) que mièn dab l'ajuda d'expèrts internacionaus un estudi arron la question deu numeric occitan, mei especificament lo maine deu Tractament Automatic deu Lengatge (TAL). Arron ueit mes tribalh, que produsín un inventari deus utís e de las ressorsas qui existeishen uei e que perpausèn un plan d'accion comun tà cinc ans (2015-2019) tà desvolopar los qui hèn besonh (correctors ortografics, traductor automatic, sintèsi vocau, etc.).