Lo Congrès envitat a las jornadas Linguimondi en Corsega

Linguimondi

Dens l'encastre de la jornada europèa de las lengas, la Collectivitat territoriau de Corsega e l'Universitat Pasquale Paoli de Corte qu'organizèn deu 29 de seteme au 3 d'octobre las jornadas Linguimondi on Lo Congrès èra envitat.

Dab conferéncias, concors de projèctes o d'enterpresas numericas (Lingua azzione) e un vilatge d'operators e d'actors lingüistics e culturaus, aqueras jornadas qu'èran viradas de cap au desvolopament de l'economia de las tecnologias tà la lenga còrsa.

Benaset Dazéas, director deu Congrès, que i presentè la huelha de rota de desvolopament numeric de l'occitan au parat d'ua conferéncia dedicada a las oportunitats deu numeric e deus finançaments europèus tà las lengas minorizadas. Qu'intervienón tanben Imanol Urbieta, director d'Uzei en Euskadi (« Industria de la lenga basca »), Asunción Moreno de l'Universitat politecnica de Barcelona (« Ressorsas e tecnologias tà la lenga catalana »), Sébastien Quenot (« Programa Lingua 2020 ») e Monia Sanna (« Los programas europèus e la lenga còrsa ») de la Collectivitat territoriau de Corsega.

Que i èran au vrèspe desvolopaires, traductors, operators institucionaus e enterprenedors qui hasón presentacions d'experiéncia e un escambi dab los estudiants.