Lo vèrb’Òc disponible en occitan provençau !

vèrb’Òc provençau

Èra fòrça esperat per la comunautat ; es tre ara disponible : lo conjugador dau Congrès vèrb'Òc existís desenant en occitan provençau.

Per aqueleis òbras, l’equipa dau Congrès a tengut còmpte dau fons comun de la lenga, sens jamai negligir sa variacion intèrna, segon l'esperit de concepcion de seis otís.

Es estat concebut sota la direccion scientifica de Bernard Moulin, vicepresident dau Conseu lingüistic, que s'es basat entre autrei sus lo Tresor dóu Felibrige, lo grand diccionari classic de Frederic Mistral, e mai d’obratges de la seccion de Provença de l’Institut d’Estudis Occitans (Gramatica provençala e atlàs lingüistic, Diccionari de basa francés-provençau, Diccionari provençau-francés). Leis òbras dei precedents vèrb'Òc foguèron tanben presas en còmpte.

De mai, l'equipa dau Congrès a obrat a metre en forma lei 7359 vèrbes dau conjugador, amb lei 123 modèls de conjugason que li son associats ; lo classament e l’organizacion dei modèls son lo trabalh de Florence Marcouyre, lexicografa dau Congrès. Per çò qu’es de la generacion dei conjugasons e mai de la programacion informatica necessàrias a sa realizacion, son l’òbra d'Aure Séguier, desvolopaira TAL (tractament automatic dau lengatge) dau Congrès.

L'aplicacion mobila dau vèrb'Òc per l'occitan provençau serà lèu disponibla.