Los còrpus deu Congrès en linha

Còrpus deu Congrès

Lo Congrès que sòrt de desvolopar un apèr navèth entà consultar los còrpus sons.

Mei ergonomic, que perpausa mantua foncionalitat navèra com lo filtre per varietat e la recèrca per expressions regularas. Que s’i horní autanplan un còrpus audio (frasas qui’s pòden léger e escotar).

Dens l'encastre de la creacion d’apèrs de tractament automatic deu lengatge, Lo Congrès qu’a hargat mantun còrpus entà entrainar sistèmas d'intelligéncia artificiala. En avisà’s qu’aqueths còrpus podèvan tanben interessar lo public, qu'a bastit ua interfàcia entà’us consultar.

Aquera interfàcia que sòrt d’estar tornada pensar entà perméter recèrcas mei apregondidas e mei especificas. L’apèr navèth de consultacion de còrpus deu Congrès que permet :

  • De filtrar las citacions per varietat ;
  • De cercar mantua fòrma, espaçada d'un o mantun mot ;
  • D'utilizar expressions regularas.

Auta nautat, Lo Congrès que perpausa tanben a la consultacion un còrpus audio. Peu moment, qu’ei compausat peus enregistraments hèits entà bastir la sintèsi vocau en occitan gascon. Que serà lèu enriquit de ressorsas autas, mei que mei los enregistraments de la sintèsi vocau en occitan lengadocian.

Per cada citacion, lo còrpus audio qu’aficha la soa transcripcion en AFI (alfabet fonetic internacionau) e que’n perpausa un enregistrament audio. L’interfàcia navèra que permet de cercar ua frasa a partir de caractèrs ortografics, mes tanben a partir de fonèmas.

Lo Congrès qu’a per mira d'aumentar lo nombre de tèxtes a disposicion e de perpausar lèu un còrpus bilingüe francés occitan.