Lo prètzhèit deu programa Còrpus de la paraula deu ministèri de la Cultura e de la Comunicacion qu'ei de valorizar lo patrimòni lingüistic de França. Tad aquò har, que balha accès en linha a fons sonòrs transcriuts e numerizats, en francés e dens las diferentas lengas parladas suu territòri. Que s'i pòt descobrir lengas a partir d'un camin sonòr, e tanben apréner quin aqueras dadas e son estadas hèitas e quin se pòden espleitar.
Opentrad es una plataforma de traduccion automatica en còdi obèrt. A per particularitat d'integrar las lengas ditas regionalas. Pren per exemple en compte lo catalan, lo basque, lo breton, lo gallés, lo galician... Pel moment, demest los parelhs de lenga estables ja desvolopats, trobam occitan-catalan e occitan-castelhan e lo consòrci Opentrad es a trabalhar sul parelh occitan-francés.
Wikiccionari es la partida occitana del projècte multilingüe Wikitionary, de la fondacion Wikimedia. Èra a la debuta un simple complement lexical a l'enciclopèdia liura Wikipèdia. Mas pauc a pauc es vengut mai qu'un diccionari, e i trobam uèi las definicions, las prononciacions, las variacions dels mots e lors etimologias, atal coma de traduccions. L'idèa es d'i ajustar pauc a pauc los sinonims e antonims, los mots parents, las locucions e expressions derivadas...
Lo Dictionnaire provençal-français ou Dictionnaire de la langue d'oc ancienne et moderne, suivi d'un vocabulaire français-provençal de S.J. Onorat es estat numerizat. Lei tres volums d'aquel obratge se pòdon ara legir sus Google books.
La Chambra d'Òc a realizat un otís que lista los toponims de las Valadas Occitanas e Francoprovençalas. Gràcias a un motor de recèrca o a una navigacion geografica, s'i pòdon afichar los toponims dins lor forma locala (grafias classica e de l'Escolo dóu Po), en francoprovençal e en italian, amb lor descripcion istorica e/o etnografica, significacion, descripcion geografica e georeferenciament.
Aqueste guida, concebut per Florian Vernet, lingüista e membre del Conselh lingüistic del Congrès, es una primièra apròcha que poiretz completar per la lectura de son libre Dictionnaire gramatical de l'occitan languedocien. Explica la prononciacion e l'accentuacion de l'occitan, abòrda los acòrds, las conjugasons, los diferents tipes de mots...
