Manifestacion a Tolosa ende l'ensenhament de l'occitan

Manifestacion per l'ensenhament de l'occitan a Tolosa

3000, es le nombre de manifestants que la polícia comptèc aqueste dimenge 17 de heurèr pendent l’amassada ende la valorizacion de l’ensenhament de l’occitan a Tolosa, coorganizat peu CREO Tolosa, la FELCO, Lo Congrès e le CREO Montpelhèr, dambe le sosteng d’un nombre plan important d’associacions e d’elegits.

Èran representats per Mn Moudenc, Conse de Tolosa, Mn Bagnéris, Conselhèr Departamentau de Garona-Hauta, Dauna Lumeau Preceptis, Conselhèra Regionala que representava Dauna Delga, e Patric Roux, Conselhèr Regionau delegat a la cultura occitana.

D’una votz comuna, se son opausats dambe nhac a la reforma Blanquer que desvaloriza bravament l’ensenhament de l’opcion d’occitan. An tanben denonciat les actes recents de la Rectora Bisagni-Faure qu’angoc a l’encontra de la convencion Estat – Rectorats – Regions signada en 2017. 

Le President deu CREO Tolosa a clarament condemnat les actes d’aqueres dus hauts representants de l’Educacion Nacionala e sollicitat precisament tres engatjaments :

  • Una dotacion especifica ende l’ensenhament de l’occitan coma estoc totjorn le cas dinc aquiu
  • Un alinhament sus las lengas de l’Antiquitat au licèu
  • Una lei, promesa peu President de la Republica avant son eleccion, ende enquadrar l’ensenhament de las Lengas de França

L’escaijuda d’aquera amassada pacifica, hestiva, intergeneracionala, on les manifestants an mercejat en dirècte les policiers presents, diu interpelar le governament tanplan coma la collectivitats territorialas qu’an, amassa, la responsabilitat d’aqueth patrimòni.

An convidat a manifestar :
CREO Tolosa – FELCO – CREO Lengadòc - CREO Aquitània – IEO – ÒcBi Felibritge Mantenéncia LengadòcCalandretasConvergéncia OccitanaOstau BiarnésOstau ComengésCarnaval GasconEscota e MinjaPaïs de CatinouLo Congrès – CIRDOC – CCOR  – Cap a l’òc – ADOC – CAOC – Lo JornaletAquí l’òc  – Felibritge mantenéncia Gasconha Haut Lengadòc – CELO – SFAIEO – IEA-AALO – Caminòc – Coordinacion occitana de la region OPMCollectiu entà l'Ensenhament de l'Occitan en GirondaCompanhia Gric de PratAssemblada OccitanaÒc Malhòrca – DGPLGC – Paren'ÒcEscòla Gaston FèbusReclamsZo petaçonD'Arts et D'ÒcTrad Savès – AELOC – CFPÒC N. Aquitània.

Podètz contunhar de sosténguer aqueth projècte de societat ende que nòstes dròlles contunhen d’aver la causida de la diversitat lingüistica :