Dispositius « Ensenhar » per l'occitan

Borsas ENSENHAR

La borsa d’estudi ENSENHAR s’adreça als estudiants que se destinan a ensenhar en occitan dins las escòlas mairalas e elementàrias de las filièras publicas bilingüas occitan-francés e del fialat associatiu Calandreta dins las acadèmias de Bordèu, Limòtges, Montpelhièr, Peitius o Tolosa (regions Novèla-Aquitània e Occitània).

D’un total de 4 000 € atribuïts per annada universitària (que se pòt renovelar una seconda annada, jos condicion, siá un total maximal de 8 000 €), s’agís d’una ajuda individuala e a prètzfach (que se pòt cumular ambe d’autras ajudas individualas). Es accessibla als estudiants inscrits en Licéncia 3 o Master 1, motivats per l’ensenhament en occitan e engatjats dins una formacion universitària que prepara al mestièr d’ensenhant de classa bilingüa*.

Lo dispositiu de borsa d’estudi ENSENHAR a per objectiu de sostenir las vocacions al concors de recrutament dels professors de las escòlas bilingüas, dins lo quadre d’un partenariat entre las Regions Novèla-Aquitània e Occitània, lo ministèri de l’educacion nacionala e l’Ofici public de la lenga occitana. S’agís en efièit de respondre a la demanda creissenta de dobertura de novèls sites escolars bilingües dins nòstras acadèmias.

Los estudiants interessats son invitats a depausar un dorsièr de candidatura alprèp de l’Ofici public de la lenga occitana (informacions, condicions e lista de las formacions eligiblas sus son site internet : www.ofici-occitan.eu).

Un dispositiu tanben pels professors per l’Acadèmia de Bordèu : « ENSENHAR - Professor »

Lo dispositiu « ENSENHAR – Professor » consistís en la prèsa en carga per l’Ofici public de la lenga occitana d’una formacion en favor deus – de las ensenhaire-a-s deu 1èir grad e deu 2nd grad titulàri-a-s de l’Educacion nacionau desirós-a-s de se formar a l’occitan per fin d’ensenhar dens aquera lenga. Es mèsa en plaça dens l’encastre d’una experimentacion menada conjuntament per l’Ofici public de la lenga occitana e lo rectorat de l’academia de Bordèu.

Desiratz ne saber mai sus l'objectiu d'aquel dispositiu ? A qui s'adrèça ? Sas modalitats, son còst, lo planning, la constitucion del dorsièr o encara lo procediment de seleccion dels candidats ?

Trapatz totas las entresenhas a l'unglet "Pels professors" a la pagina dedicada :