Amassada en Navèra Aquitània

Amassada 2020

Los 27 e 28 d’aost, que s’apleguè a l’ecomusèu de Marquesa a Sabres (Lanas) l’Amassada – Conselh de desvolopament lenga e cultura occitanas en Navèra Aquitània.

Aqueras jornadas que las obrí Charline Claveau, Conselhèra regionau delegada a las lengas regionaus ; qu’amassèn representants de collectivitats, de l’Estat, e d’operators institucionaus e associatius en Region Navèra Aquitània. Ad aqueth parat, representants de las Edicions Reclams e deu Congrès permanent de la lenga occitana, coeditor de l'òbra, que remetón oficiaument a Charline Claveau un exemplar de l’edicion navèra deu Dictionnaire du Béarnais et du Gascon modernes de Simin Palay.

Ad’arron que’s hasó lo bilanç (2016-2020) e las perspectivas de la politica lingüistica de la Region Navèta Aquitània e ua purmèra restitucion deus resultats de l’enquista sociolingüistica miada per l’OPLO sus l’espaci occitanofone de las Regions Navèra Aquitània, Occitania e deu Conselh generau de Val D’Aran.

L’endedia que i avó escambis a l’entorn de presentacion d’accions e talhèrs tematics (ensenhament, formacion profesionau, besonhs en formacion de las associacions).

La traduccion simultanèa de l’Amassada qu’èra hèita per l’equipa deu Congrès permanent de la lenga occitana.