Comunicat : convencion per l’ensenhament de l’occitan dins las acadèmias de la region Occitània

Comunicat region Occitània

La region Occitània a publicat un comunicat pertocant la signatura de la convencion per l’ensenhament de la lenga occitana amb las acadèmias de Tolosa e Montpelhièr, en partenariat amb l’Ofici public de la lenga occitana (OPLO), los departaments d’Avairon, de Garona Nauta, de Gèrs, dels Pirenèus Nauts, de Tarn e de Tarn e Garona, e la vila de Tolosa.

Del Congrès estant, nos regaudissèm plan del sosten public de la region cap a l’ensenhament de l’occitan, autant coma de l’engatjament de las acadèmias signatàrias e de l’OPLO que collabòran per o far.

Volèm tanben senhalar çaquelà qu’a calgut esperar mai de tres ans aquelas declinasons academicas de la convencion quadre de 2017 dins la region Occitània, e planhem tanben que la crisi sanitària aja entrepachat una presentacion publica davant los partenaris e un escambi mai dirècte.

Notam particularament una contradiccion prigonda entre los objectius de desvolopaments de las convencions e las mesuras presas al nivèl nacional pel ministèri de l'Educacion nacionala. Aquelas mesuras (reforma del licèu, Plan lengas, demesida dels mejans...) son l'encausa d'una demesida de l'oferta, de las possibilitats d'ensenhament, d'una desvalorizacion mortifèra e fin finala, mai que mai en licèu, d'una fòrta baissa dels efectius que pòdon gausir d'un ensenhament d'occitan.

Se las collectivitats territorialas signatàrias e los elegits an ja denonciat las mesuras mortifèras del ministèri de l’Educacion nacionala, devon contunhar de demandar lor emendament e un plan nacional en favor de l'occitan per que se pòsca aténher los objectius de las convencions regionalas.

ʽʽComunicat de premsa :

 

En partenariat amb l'OPLO, la region Occitània, las acadèmias de Montpelhièr e de Tolosa s’engatjan per l’ensenhament de l’occitan

 

Montpelhièr, Tolosa, lo 13 de novembre de 2020

En partenariat amb l'Ofici public de la lenga occitana (OPLO), la region Occitània, las acadèmias de Montpelhièr e de Tolosa signan las convencions per l’ensenhament de l’occitan. Los conselhs departamentals d’Avairon, de Garona Nauta, de Gèrs, dels Pirenèus Nauts, de Tarn e de Tarn e Garona, atal coma la vila de Tolosa son signataris de la convencion establida amb l’acadèmia de Tolosa.

La region realiza una politica ambiciosa a favor del desvolopament de la transmission de las lengas catalana e occitana. Per l’occitan, la region Occitània e lo ministèri de l’Educacion nacionala, acampats al còr de l'Ofici public de la lenga occitana (OPLO), adoptèron tre 2017 una convencion interacademica per fixar un encastre relatiu a las modalitats d’ensenhament de l’occitan dins las acadèmias de Bordèu, Lemòtges, Montpelhièr, Peitius e Tolosa. Las convencions particularas amb las acadèmias de Montpelhièr e de Tolosa, que venon d’èsser signadas, ne precisan las modalitats de mesa en òbra.

« Soi particularament estacada a la diversitat culturala e lingüistica de nòstra region. Lo catalan e l’occitan representan un apòrt cultural favorable a la creativitat, a la transmission e al ligam social dins nòstres territòris, fargant l’identitat de nòstra region. Es per aquò que menam una politica volontària e ambiciosa a favor de lor desvolopament e de lor valorizacion. Lo creis del nombre de locutors passa per l’ensenhament d’aquelas lengas tre l’enfança e pendent tot lo cursus escolar. Far perdurar l’ensenhament de las lengas regionalas es una necièra culturala e patrimoniala ! La signatura de las convencions constituís una de las garantidas » çò declarèt Carole Delga, presidenta de la region Occitània.

« L’acadèmia de Tolosa es fòrça estacada a l’ensenhament de l’occitan, de la mairala a l’universitat, e es doncas l’objècte d’una politica activa que contribuís a sa transmission. Aprene, conéisser, practicar una lenga regionala, es en efèit se metre en relacion amb una memòria, una cultura, es tanben se donar d’atots per afortir lo mestritge de la lenga francesa e abordar d’autras lengas, es un mejan de dobrir l’esperit e de concebre l’alteritat. Atal, la carta academica de las lengas vivas pren en compte l’occitan, e la formacion d’ensenhaires novèls en lenga regionala es un ais de trabalh prioritari de l’acadèmia. Son gaireben 30 000 escolans los que seguisson un ensenhament regular d’occitan dins l’acadèmia de Tolosa, dont mai de 6 000 en cursus bilingüe. » çò remembrèt Mostafa Fourar, rector de l’acadèmia de Tolosa.

« Me regaudissi de la signatura d’aquela convencion. L’acadèmia de Montpelhièr mena una accion volontarista e dinamica a favor de la transmission de las lengas e culturas regionalas, l’occitan e lo catalan. Aquò permet d’ara endavant a gaireben 14 000 escolans d’estudiar l’occitan e a 1 300 de beneficiar d’un cursus bilingüe tre la mairala. Aprene une lenga regionala es un atot pels escolans qui descobrisson e s’apròprian una cultura e lor patrimòni regional, e se dobrisson a l’encòp a l’aprendissatge de las lengas vivas. Aquela convencion permetrà de desvolopar las accions pluridisciplinàrias e federativas e las formacions que contribuisson a la vitalitat de nòstra accion. » çò soslinha Sophie Béjean, rectora de la region academica Occitània, rectora de l’acadèmia de Montpelhièr.

Segon Patric Roux, vicepresident de l’OPLO : « Aquelas convencions son essencialas per assegurar la transmission de la lenga occitana dins las acadèmias de Tolosa e de Montpelhièr per las annadas seguentas. Engatjan los partenaris a unir lors esfòrces per i afortir d’un biais duradís l’ensenhament de l’occitan en fixant d’objectius precís e de mejans a alogar. Concrètament, garantisson la continuitat dels cursus, de la mairala al licèu, en inclusent una partida dedicada a la formacion dels ensenhaires e consolidan totas las filièras, notadament publicas e Calandretas ».

Partida integranta del patrimòni francés, la lenga e la cultura occitanas tenon una plaça màger per la bastison de la ciutadanetat, l’enriquiment de la personalitat e la compreneson de França e del mond. Quatre orientacions principalas son declinadas dins las convencions pel desvolopament e l’estructuracion de l’ensenhament de l’occitan signadas amb las acadèmias de Montpelhièr e de Tolosa :

• Un objectiu de 26 % d’escolans bilingües de mai mercés a l’obertura de sites novèls d’ensenhament en lo primièr gra
• La bastison o l’afortiment de cursus complèts al còr de bacins educatius, per assegurar una continuitat de l’aprendissatge lingüistic
• La mesa en plaça d’otisses de pilotatge qu’auràn per tòca de facilitar lo dialòg entre los servicis de l’Educacion nacionala, las collectivitats territorialas atal coma los operators associatius qu’òbran a favor de l’ensenhament de l’occitan
• La mesa en plaça de mejans que permeten de far créisser lo nombre d’ensenhaires novèls, coma las borsas Ensenhar finançadas per l’OPLO e lo comjat de formacion per l’Educacion nacionala.

Una convencion per l’ensenhament del catalan es tanben a se redigir, en collaboracion estrecha amb l’Ofici public de la lenga catalana. Deuriá èsser signada en 2021. Aquel engatjament serà estenut al nivèl internacional dins l’encastre de las orientacions fixadas dins la fuèlha de rota de l’Euroregion. En 2021, un plan transversal de valorizacion de la diversitat lingüistica d’Occitània serà realizat.ʼʼ

Aquela novèla aguèt un resson dels bèls per la premsa :

Crèdit fòto : Romain Saada