Lo Senat adòpta los emendaments de la lei pertocant las lengas territorialas

Lei adoptada al Senat

Practicament voidada de sa substància per l’Assemblada nacionala en febrièr passat, la proposicion de lei portada pel deputat Paul Molac foguèt debatuda aqueste dijòus 10 de decembre al Senat.

Los emendaments depausats notadament per Max Brisson e Frédérique Espagnac foguèron adoptats.

Los emendaments depausats pòrtan notadament sul restabliment del prètzfach escolar efectiu que permetrà de securizar lo finançament de las escòlas immersivas amb estatut associatiu, dont Calandreta, Diwan o encara Ikastola fan partida.

La senhaletica bilingüa serà d’ara enlà reconeissuda dins la lei. L’article 9 autoriza ara los signes diacritics en lenga regionala dins los actes d’estat civil. Dich autrament, Fañch poirà fin finala gardar sa tilde, e Martí son accent agut.

Aquestes emendaments suscitèron un avís favorable de la comission, mes un avís desfavorable del govèrn. Lo ministre de l’Educacion, Jean-Michel Blanquer, quitèt pas de tornar dire qu’« una exigéncia d’equilibri s’impaus[ava] » entre la lenga francesa e las lengas territorialas, en tot assegurant que l’Estat francés las defendriá. « Es pas vertat que l’Estat siá ostil a las lengas regionalas », çò afirmèt al moment de son discors prealable als debats. D’ara enlà, es a l’Assemblada nacionala de tornar examinar lo tèxte en segonda lectura.

Fòto © Pierrick Nannini / FTVIASTELLA