Letra de ligason :

Fòrum en linha Innovacion, tecnologias e plurilingüisme per la DGLFLF, au parat de la presidéncia francesa de l'UE.

Fòrum de la DGLFLF

Au demiei deus temps hòrts labellizats « presidéncia francesa deu Conselh de l'Union Europèa 2022 », lo ministèri de la Cultura, peu mejan de la Delegacion generau a la lenga francesa e a las lengas de França, qu'organizè deu 7 au 9 de heurèr de 2022 lo fòrum interministeriau Innovacion, tecnologias e plurilingüisme, sancèrament en linha, au quau estó invitat lo Congrès.

Innovacion, promocion, tecnologias e plurilingüisme

Au programa, quate tematicas :

  • lo plurilingüisme e la traduccion dens ua Euròpa de la cultura e de la coneishença de cap au desfís deu numeric ;
  • l’aprentissatge e l'ensenhament de las lengas en Euròpa, la lor promocion e la lor atractivitat per l'innovacion numerica ;
  • lo tractament automatic deu lengatge, lo « descobridèr » deus contienguts scientifics, la collècta, l'avaloracion e lo partatge de las ressorsas lingüisticas numericas, dab los actors deus mondes scientifics, de la recèrca e de l'enterpresa ;
  • las tecnologias deu lengatge, au servici deu ciutadan europèu, entà promòver las valors de l'UE e un sentiment d'apertenéncia comuna.

Un fòrum sancèrament organizat en linha

Un vilatge virtuau d'expausants (enterpresas, collectivitats, laboratòris, institucions, associacions) que permetón escambis enter professionaus e la presentacion au public d'utís, de tecnologias e d'innovacions plurilinguas. Daubuns rendetz-ve individuaus en linha, entà dialogar dab ua seleccion d'intervienents, qu’estón tanben perpausats au briu deu programa.

Lo Congrès permanent de la lenga occitana que i intervienó dens la jornada dedicada qui avè lo tèma Ciutadanetat, diversitat, coesion sociau e apertenéncia, a la taula redonda A : Projèctes entà la diversitat de las lengas per la contribucion numerica.

Los tribalhs d'aqueth fòrum qu'alimentaràn la reflexion deus ministres de la Cultura de l'Union Europèa, en vista de las lors discussions entà las conclusions deu Conselh relativas a l’ahortiment deus escambis interculturaus capvath l'espaci europèu per la mobilitat deus artistas e deus professionaus de la cultura, e peu plurilingüisme dens l'environament numeric.