Letra de ligason :

Signatura de la convencion Linguatec entà las universitats

convencion Linguatec entà las universitats

Las universitats publicas de Saragòssa, Navarra, País Basco e Pau que signèn ua convencion entà l'utilizacion deus utís tecnologics entà l'aragonés, lo basco e l'occitan desvolopats peu programa Linguatec.

Lo 20 de genèr passat, que’s signè la convencion de collaboracion enter las universitats de Saragòssa, de Pau, deu País basco, l'Universitat publica de Navarra e la fondacion Elhuyar, dab la mira de promòver los utís tecnologics e las aplicacions desvolopadas capvath lo projècte LINGUATEC, entà las lengas basca, aragonesa e occitana.

La signatura que’s hasó a Jaca, on las personas seguentas èran presentas : lo rector de l'Universitat de Saragòssa, José Antonio Mayoral ; lo rector de l'Universitat deu País basco, Eva Ferreira ; lo rector de l'Universitat publica de Navarra, Ramón Gonzalo ; la directora executiva de l'Aliança europèa UNITA de l'Universitat de Pau e deus País de l'Ador, Sabine Forero-Mendoza ; lo coordinator generau d'Elhuyar, Jong Abril ; lo maire de Jaca, Juan Manuel Ramón e lo director generau de la politica lingüistica deu govèrn d'Aragon, José Ignacio López Susín.

La convencion qu'estableish la linha a seguir per las entitats collaboradoras deu projècte europèu Linguatec, qui vòu desvolopar utís innovants dens lo procès de numerizacion de l'aragonés, deu basco e de l'occitan, atau com l'accès multilingüe aus contienguts entaus utilizaires finaus.

Elhuyar, ua entitat dont l'objectiu ei d'espandir la sciéncia e la lenga basca, que meterà a la disposicion de las universitats las aplicacions tecnologicas desvolopadas entà las lengas basca, aragonesa e occitana.

Que s'ageish sustot de las tecnologias de traduccion automatica, de reconeishença e de sintèsi vocaus qui son estadas integradas dens aplicacions taus com barras descargables entà Google Chrome e Firefox, plugins entà CMS taus com WordPress, correctors, APPs de traduccion automatica e audioguidas accessibles multilinguas (Elia, Traduze, Aragonario, Aditu, Votz, ReVOc, LinguaPir, Revirada,...).

Las universitats publicas que collaboraràn a l'avaloracion e au melhorament de las ressorsas, atau com a la generacion d'idèas e de projèctes en intelligéncia artificiau entà desvolopaments a viéner qui contribuiràn a melhorar la gestion multilingua.

Entà aténher los objectius, un comitat de seguit conjunt que s’aviarà, qui s’amassarà un còp l’an.

Que representa un progrès sus la via obèrta peus membres deu consòrci Linguatec quan, dens l'encastre deu congrès transfronterèr Linguatec en junh de 2021, signèn lo manifèste fondador deu hialat d'excelléncia en intelligéncia artificiau entà la construccion d'ua infrastructura lingüistica transfronterèra, inclusiva, multilingua e intelligenta.