Letra de ligason :

Questionari PQVNL als candidats a l’eleccion presidenciala 2022

Questionari PQVNL 2022

Lo collectiu Pour Que Vivent Nos Langues mandèt als candidats a la presidéncia de la Republica en genièr un questionari per conéisser – e far conéisser publicament – lo posicionament de cadun d'entre eles sus las lengas regionalas.

Après un brèu istoric de las mesuras recentas en favor e contra las lengas regionalas, 6 questions lor son donc adreçadas :

 

  1. Se sètz elegit, prepausaretz una revision de la Constitucion en favor de las lengas regionalas ? Se òc, quala(s) modificacion(s) prepausaretz, e a quala escasença ?
  2. Se sètz elegit, metretz en plaça un estatut e de mejans especifics per las lengas regionalas dins l'ensenhament ?
  3. Quala es vòstra posicion pertocant [la] reconeissença [de cooficialitat] ? S'i sètz favorable, qualas mesuras metretz en plaça per i arribar ?
  4. En complement de la modificacion de la Constitucion en França, faretz ratificar, dins lo respècte dels dreches fondamentals e sens clausula interpretativa, la Carta del Conselh d'Euròpa sus las lengas regionalas o minoritàrias de 1992, signada per França mas totjorn pas ratificada ?
  5. Faretz respectar aqueles dos articles de lei [312-10 e 312-11-2 del còdi de l'Educacion] per que l'ensenhament de la lenga regionala siá efectivament « favorizat » e « prepausat » « a totes los escolans » dins los territòris concernits ?
    Faretz en sòrta, amb los mejans necessaris, que totes los rectorats e regions concernits apliquen las convencions previstas per la lei pel desvolopament d'aquela ofèrta generalizada ?
  6. Prendretz las decisions necessàrias per que los mejans financièrs e umans en favor de las lengas dichas regionalas sián aumentats per tal que sián mai en rapòrt amb lors besonhs e los enjòcs que representan ?

Vos tendrem informats tre qu'una o mantunas responsas seràn estadas fachas publicament. Un afar de seguir.