Letra de ligason :

Amb la Region, un “kit d’orientacion” especial occitan

Kit d’orientacion especial occitan

Dempuèi 2018, las missions relativas a l’orientacion escolara son fisadas a las Regions. Aquelas competéncias novèlas permeton a la Region Novèla-Aquitània e a la Region Occitània d’integrar la promocion dels percors professionals e de formacion relatius a la lenga occitana a lor estrategia de politica lingüistica.

Dins los establiments escolars, los professors participan activament a aquela promocion, dins l’encastre del “Parcours Avenir” o a d’autras escasenças. Per respondre a un besonh latent d’equipament d’aqueles actors de la transmission de la lenga, las Regions prepausèron a l’OPLO de concebre un « kit d’orientacion », destinat a fornir aisinas de comunicacion per preparar o organizar un taulièr dins los establiments o a l’escasença d’un eveniment (jornadas pòrtas dobèrtas per exemple).

Aqueles kits seràn meses a la disposicion dels ensenhaires e caps d’establiment, sus demanda, gràcias a un formulari en linha.

L’elaboracion d’aquela aisina s’inscriu dins l’encastre del Plan d’accion licèu per la lenga occitana, finançat per la Region Novèla-Aquitània e la Region Occitània, en collaboracion amb lo Ministèri de l’Educacion nacionala e lo Ministèri de la Cultura.