Amassada d'Aquitània

Amassada

Lo Conselh regionau d'Aquitània que hasó la soa Amassada annau lo divés 19 de deceme. Aquera assemblada plenèra qu'a per tòca ua concertacion regionau enter actors publics e privats, l'elaboracion d'un esquèma regionau d'amainatjament lingüistic e la cooperacion interregionau.

Lo Congrès qu'i èra present e que participè lo matin a la comission « ensenhament », qui's debanava en dens lo medish temps que las comissions « mèdias e vita sociau », « formacion » e « cultura ». David Grosclaude, conselhèr regionau encargat de l'occitan, qu'i presentè lo futur Ofici public de la lenga occitana, qui deveré estar creat en 2015. ÒCtele que presentè era un bilanç de la soa activitat un an après la soa creacion.

Enfin, aquera Amassada qu'estó lo parat d'avalorar lo tribalh de Martial Peyrouny, professor d'occitan peirigordin. Gilabèrt Mercadièr, president deu Congrès, que'u remetè las Palmas academicas en soslinhant au còp las soas qualitats pedagogicas e lo son devoament a l'occitan.

Marcial Peyrouny e Gilabèrt Mercadièr