Lo diccionari de Palay tornat editar fin finala !

Simin Palay

Qu'ei un eveniment deus màgers. Lo diccionari de referéncia de Gasconha, lo Dictionnaire du béarnais et du gascon modernes, que s'èra hèit rar.

Que's venè a prètz qui passavan los 1000 € a bèths còps. Que serà fin finala tornat editar per las edicions Reclams e lo Congrès Permanent de la Lenga Occitana. Aqueth obratge, aqueth tesaur gascon com l'aperava l'istorian Charles Samaran (1879 – 1982), que va mei enlà qu'un simple diccionari. Explorem-ne las riquessas en aténer l'aviada de la soscripcion qui començarà tanlèu la rentrada de 2019.

Ei tostemps d'actualitat lo diccionari ?

Tot que depenerà de çò que'n voletz har. Si cercatz un mot entà léger un libe contemporanèu, que trobaratz mei aisidament en dicod'Òc publicat en linha peu Congrès Permanent de la Lenga Occitana. Quan seré pr'amor lo diccionari qu'ei en grafia classica com la màger part de las produccions de uei. Si cercatz ua expression emplegada en un parçan particular, lhèu que'vs calerà consultar un diccionari especific. La mapa deus diccionaris de Jean Lafitte per exemple que'vs permeterà de'n causir un.

Pr'aquò lo diccionari deu Simin Palay qu'ei indispensable autanlèu que volhatz léger obratges rics en vocabulari, mei ancians, en grafia febusiana, o l'immensa produccion deu sègle XIXau e de la purmèra mieitat deu sègle XXau. Jacques Gourc, professor a l'universitat Joan Jaurès Tolosa 2, qu'afirma qu'ei l'obratge que deveré possedir tot estudiant de gascon. Obratge indispensable entà léger l'òbra deu gran Miquèu de Camelat, obratge indispensable si voletz aver mei qu'ua simpla arrevirada.

A qué semblarà l'edicion a viéner ?

Los coeditors que preparan un diccionari en dus tòmes, corresponent au contiengut de la darrèra edicion de 1980. Qu'integrarà en lo còs deu tèxte (e non pas mei en annèxe) los 20 000 mots hornits per rapòrt a la purmèra edicion. Las entradas que demoraràn en grafia originau. Eric Gonzalez, Maurice Romieu, Serge Javaloyès, Jean-Luc Landi que n'an hèit ua relectura suenhada. Dus tèxtes introductius que'u completaràn, l'un sus la lenga, l'aute sus l'istòria deu diccionari.

Que serà venut dab o shens esclipòt. Los qui volhan prereservar un exemplari que pòden escríver a Reclams : secretariat@reclams.org.