Parucion del 1èr libre dels parlars del Creissent

1èr libre dels parlars del Creissent

Ven d’èsser publicat, dins lo quadre del projècte « Les Parlers du Croissant » portat pel CNRS :

« Grammaire du parler marchois de Dompierre-les-Églises (Haute-Vienne) », per Maximilien Guérin, a las Edicions L'Harmattan (Broché - format : 15,5 x 24 cm • 386 paginas ; ISBN : 978-2-343-18863-8).

S’agís del primièr obratge de la colleccion «Les Parlers du Croissant» en cò d’aquel editor (colleccion creada pel projècte eponim del CNRS).

L’obratge es d’ara enlà disponible a la comanda sul sit de l’editor, en librariá o sus la màger part dels sites de venda en linha. Deuriá èsser disponible dins las librariás de Nauta Viena, de Crusa e d’Indra dins las setmanas venentas.

Presentacion de l’obratge :

    Aquel libre es lo primièr estudi d’aquela importància consacrat al dompierrés o parlar de Dompierre-les-Églises (Nauta Viena), uèi menaçat de disparicion e situat dins la zòna lingüistica dicha del Creissent.

    S’agís d’una descripcion apregondida de la gramatica de la lenga, elaborada segon la metodologia actuala en lingüistica descriptiva : fonologia, morfologia derivacionala, morfologia flexionala (plural e genre dels noms, conjugason dels vèrbes) e sintaxi. L’obratge prepausa tanben una introduccion presentant l’istòria e la situacion sociolingüistica actuala de la lenga. En mai, conten un còrpus transcrich d’expressions idiomaticas, atal coma de tèxtes originals o traduches. S’i trobarà tanben un lexic dompierrés-francés de mai de 3000 entradas, seguit d’un ensenhador francés-dompierrés.

    L’obratge s’adreça tant als lingüistas romanistas coma als especialistas de tipologia o de comparatisme. Poirà interessar los locutors del bas-marchés, mas tanben los enfants o felens de locutors que desiran descobrir o tornar descobrir lor lenga familiala.