Concors de novèlas 2022 pel Lector del Val

Concors Lector del Val 2022

"Son a mudar, e en descargant lo camion, aquí que te tròban un carton de mai." Escrivètz la seguida !...

Las bibliotècas del Lector del Val (associacion de bibliotècas de Lauragués / sud-èst tolosan) organizan lor 24en concors de novèlas (qu’es lo 10en en occitan), dobèrt a totes e a gratis, fins al 17 de febrièr de 2022.

Se pòt participar dins quatre categorias : primari, segondari, licèus, adults (los tèxtes collectius son permeses se fan partida de l’ensenhament d’una classa tota). Lo tèxte deu necessàriament començar ambe la frasa çai-sus. Lo genre demòra liure : fantastic, policièr, sciéncia-ficcion, istoric, romanesc, aventura, etc…

Totas las variantas de la lenga occitana son planvengudas, a carga pel participant de passar l’incipit dins sa varianta pròpia.

La remesa dels prèmis se debanarà lo 11 de junh de 2022 endacòm en Lauragués e la remesa dels recuèlhs de novèlas als autors se farà a la davalada de 2022. Un CD audiò de tèxtes occitans causits per la jurada serà fargat en mai de l’edicion del libre.

Tèxtes legits qu’an dejà participat e que participaràn encara a alimentar amb quantitat e qualitat lo programa ReVOc de reconeissença vocala en occitan !