Letra de ligason :

Concors d'escritura en occitan Pierre Brayac, per Aquí l’òc

Concors d'escritura Pierre Brayac

L'Associacion AQUÍ L'ÒC organiza per la tresena annada consecutiva lo concors d'escritura Pierre Brayac en Occitan pels escolars e pels adults d'Òlt, de Corresa e d’Occitània tota.

Aquel concors, gratuit e dobèrt a totes, se debanarà de novembre a febrièr. Compta 4 categorias : elementaris, collegians, liceans, adults. Las produccions pòdon èsser individualas o collectivas.

Aquesta annada 2022-2023, AQUÍ L'ÒC a causit lo genre literari del teatre, en demandant un dialòg, amb 2 o 3 personatges sus un subjècte liure. Los participants utilizaràn la lenga d'òc, qual que siá lo dialècte.

Las produccions an d’arribar a l'Associacion AQUÍ L'ÒC lo dissabte 18 de febrièr de 2023 al pus tard.

Los dialògs seràn enviats per la tresaurièra a la fin de febrièr als membres de la jurada compausada d'ensenhaires e d'escrivans d'Òlt e de Corresa e seràn corregits entre la debuta de març e a la debuta de mai.

Seràn comunicats los resultats als participants per corric la segonda setmana del mes de mai.

La remesa dels prèmis del concors d'escritura Pierre Brayac se farà lo dissabte 27 de mai a Banas, dins l'encastre del Festenal Escambis.