La riquesa culturala d'Euròpa es miralhada per la diversitat de sas lengas e de sas culturas.

Mai de 200 lengas autoctònas son parladas en Euròpa, sens comptar las nombrosas lengas arribadas sul continent pel biais de l'immigracion. Emper aquò, de nombrosas lengas regionalas e minoritàrias (LRM) se retròban en concurréncia amb las lengas europèas mai dominantas e las mai poderosas sul plan economic. Quand una lenga daissa d'èsser utilizada per totas las generacions e dins totes los aspèctes de la vida, e que se retròba limitada a d'unes grops d'edat e/o a d'unes domenis de la societat, cor lo risc de dintrar dins una espirala de declin que se pòt acabar per son extincion.

Lo Conselh d'Euròpa dispausa d'una solida experiéncia en matèria de preservacion e de promocion de las lengas europèas, sustot pel biais de sos instruments juridics.

La Carta europèa de las lengas regionalas o minoritàrias a per mira de protegir e promòure las lengas regionalas e minoritàrias e de ne permetre l'usatge dins la vida privada e publica. Cobrissent uèi lo jorn 79 lengas, utilizadas per 204 minoritats nacionalas o grops lingüistics, engatja los Estats partidas a la Carta a promòure activament l'usatge d'aquelas lengas dins l'educacion, los tribunals, l'administracion, los mèdias, la cultura, la vida economica e sociala, e la cooperacion transfrontalièra. Associada a la convencion-quadre per la proteccion de las minoritats nacionalas, la Carta constituís pel Conselh d'Euròpa un engatjament resolgut al benefici de la proteccion de las minoritats nacionalas.

Mai de la mitat dels Estats membres de l'Union Europèa reconeisson oficialament las lengas regionalas o minoritàrias sus lor territòri e aquò, a de fins juridicas o administrativas ; e s'estima a mai de 50 milions los locutors e locutrises d'aquelas lengas.

Dins l'encastre de son accion de cooperacion 2023 amb la Comission europèa, lo Centre europèu per las lengas vivas organizarà lo 7 de novembre de 2023 un collòqui portant sus las lengas regionalas e minoritàrias dins un contèxte plurilingüe. Aquel eveniment a per mira de far lo ponch sus las practicas educativas dins los contèxtes ont las LRM son espandidas. Metrà l'accent sus d'exemples de practicas ont las lengas regionalas e minoritàrias fan partida integranta del programa d'estudis e/o son utilizadas coma lengas d'escolarizacion, e que son susceptiblas d'èsser transferidas/adaptadas a d'autres contèxtes. Abordarà tot particularament los aspèctes pedagogics ligats als programas d'estudis, a la formacion dels ensenhaires e a la practica en classa, e examinarà la necessitat d'un sosten afortit de la part de la comunautat professionala dins aquel domeni.

Lo collòqui se tendrà dins lo contèxte de la recomandacion adoptada en 2022 pel Conselh d'Euròpa sus l'importància de l'educacion plurilingua e interculturala per una cultura de la democracia e s'apiejarà sus la solida expertesa del Conselh d'Euròpa en matèria de LRM. L'eveniment tendrà plenament compte de las òbras anteriorament menadas pel Conselh e la Comission europèa dins aquel domeni, aital coma de preocupacions exprimidas dins l'encastre de l'iniciativa Minority Safepack relativas a l'escambi de bonas practicas entre los sistèmas educatius europèus.

Lo collòqui amassarà de representants designats dins los 38 Estats membres del CELV e de l'Union Europèa, aital coma de malhums e associacions de primièr plan obrant dins aquel domeni.

L'eveniment aurà per mira de realizar los objectius seguents :
- afortir la sensibilizacion a l'importància de las lengas regionalas e minoritàrias – promòure la diversitat a totes los nivèls ;
- favorizar aitant coma possible la cooperacion e las sinergias entre las partidas beneficiàrias ;
- identificar los besonhs pedagogics de la comunautat professionala de las LRM, amb per objectiu de metre en plaça d'autras accions internacionalas jos la forma d'un projècte e/o de trabalhs de recèrca sus de questions de primièra importància ;
- publicar d'exemples de practicas a la fin del collòqui ;
- far lo ponch sus las accions en cors dins aquel domeni grand e metre en valor d'exemples interessants de practicas educativas susceptiblas d'èsser transferits/adaptats a d'autres contèxtes.

• Ne saber mai