L’Institut Estudis Occitans – IEO qu’ei ua associacion creada en 1944. La soa tòca qu’ei lo continuacion e lo desvolopament de la lenga e de la cultura occitana dens l’ensemble deu son airau territoriau. Entà assegurar lo son prètzhèit, l’IEO que s’i hè tot dia a obtiéner ua plaça mei importanta entà l’occitan dens la vita publica, los mèdias e l’ensenhament. L’IEO qu’ei tanben l’accion quotidiana de cada aderent entà que la cultura occitana e sia l’expression d’ua cultura viva e contemporanèa, creadora e innovatora, qui assumesca tanben la soa istòria. A l’òra d’ara, que son 1 500 aderents e 40 emplegats qui tribalhan dens las diferentas associacions federadas deu hialat de l’IEO, qui ei partatjat en 28 seccions departamentaus e sèt seccions regionaus federadas. De mei, plusors sectors, associacions afiliadas o membres de l’IEO que s’ocupan d’activitats especificas.

• socializacion / comunicacion : brocadura L’occitan qu’es aquò ?, labèl Òc per l’occitan (valorizacion de l’emplec de la lenga dens l’economia), Paginas occitanas (annuari occitan), lo servici de l’emplec (mesa en relacion deus cercaires d’emplec e de las enterpresas) ; participacion a Anem Òc (platafòrma reïvindicativa entà la mesa en plaça d’ua politica lingüistica).
• servici lingüistic : servici deu patrimòni lingüistic (informacion, recèrcas toponimicas, ajuda a la mesa en plaça d’ua senhaletica bilingua).
• cors entaus adultes : campanha de promocion deus cors d’occitan, creacion d’un labèl de qualitat (PARLESC).
• sector libe : IEO-IDECO qu’ei lo sector d’edicion e de difusion de l’Institut d’Estudis Occitans, qui assegura la màger part de la produccion occitana. Plusors seccions departamentaus e regionaus que desvolòpan tanben ua activitat d’edicion.

L’IEO qu’ei ua associacion lei 1901 reconeguda d’utilitat publica (1949) e aprovada Joenessa e educacion populara (1986). Qu’ei membre deu Hialat Europèu de Promocion de la Diversitat Lingüistica (NPLD), deu Comitat Francés de las Lengas Mensh Espandidas (EBLUL-França) e deus Rencontres Interregionaus, qui reüneishen representants de las diferentas lengas de França.

Site internet : www.ieo-oc.org