L’Institut Occitan de Cultura - CIRDOC qu’ei l’operator referenciau e privilegiat de la Region Aquitània, de la DRAC Aquitània e deus 5 departaments aquitans dens l'encastre d'ua convencion d'objectiu pluriannau entà las missions publicas realizaderas dens tres maines :

• la socializacion publica de la lenga : produccions de lexics e de tèrmis entà díser lo monde de uei lo dia. Entad aquò har, que hè hrèita ua lenga estabilizada, plan normativizada. L’Institut Occitan de Cultura que deu balhar los tèrmis adaptats en hant compte de las tres variantas occitanas de la Region Aquitània – gascon, lemosin e lengadocian – e arrevirar a mei anar mei tèxtes de tota traca de las collectivitats territoriaus, de las enterpresas, e deu quite Ministèri de la Cultura e de la Comunicacion. Que deu tanben desvolopar e promòver lo bilingüisme en direccion deus actors de la vita culturau, sociau e economica d’Aquitània.
• la valorizacion deu Patrimòni Culturau Immateriau (PCI). L’Institut Occitan de Cultura qu’ei encargat, en collaboracion dab lo Ministèri de la Cultura e de la Comunicacion – DRAC Aquitània e la Region Aquitània, de la valorizacion deu patrimòni orau occitan d’Aquitània, a travèrs lo portau Internet sondaqui.com
• en 2008, L’Institut Occitan de Cultura qu’estó encargat, dens l’encastre de l’estudi realizat a la demanda de la Region per l’ARPEL (Agéncia Regionau entà l’Escriut e lo Libe en Aquitània) sus l’edicion en lengas de França en Aquitània, de la realizacion de la part de l’estudi tà çò deus actors de la cordèra de l’edicion d’expression occitana en Aquitània.
• l’emplec de las Tecnologias de l’Informacion e de la Comunicacion entà assaber au public las soas realizacions, las deus sons partenaris publics e las deu movement associatiu aquitan.
• L’Institut Occitan de Cultura que deu assegurar enfin missions d’expertisas entaus partenaris publics dens los maines de la soa competéncia.

L’Institut Occitan de Cultura qu’ei ua associacion dab membres de dret (dont la Region Aquitània, la DRAC Aquitània e los Departaments deus Pirenèus-Atlantics e de la Gironda), qu’a un budget de 360 000 €, qu’emplega sheis personas e qu’ei estructurat en tres pòles : « lenga e societat », « cultura e societat », « comunicacion ». La soa sedença que’s tròba au castèth d’Este a Vilhèra, dens l’aglomeracion paulina. Qu’acèssa dens los sons locaus un centre de documentacion qui hè partida deu hialat de las mediatècas de l’aglomeracion paulina.

Site internet : L’Institut Occitan de Cultura - CIRDOC