Nòrmas e òbras normativas
Lo Congrès es l’organisme interregional de regulacion de la lenga occitana. La produccion de nòrmas e òbras normativas, dins divèrses domenis de la lenga, segon lo principi màger de l’afortiment de l’unitat prigonda de la lenga e del respècte de sa diversitat, es una de las missions que li son estadas fisadas : nòrmas graficas e lingüisticas, lexicografia, lexicologia, terminologia, neologia, fonologia, grafia, gramatica, toponimia, etc…
Aquelas missions son eissidas d’un procèssus collectiu e democratic qu'amassa las collectivitats, institucions e federacions istoricas occitanas, e que menèt a l’installacion oficiala del Congrès a l’Ostal de Region d'Aquitània a Bordèu, lo 18 de decembre de 2011.
Fòrt de la reconeissença publica e sociala, Lo Congrès s’apèva sus son Conselh lingüistic, una còla de lingüistas representatius de l’ensemble de l’espaci occitan. Aquel Conselh garantís lo nivèl scientific e academic de las produccions de la nòstra institucion. Lo Conselh dels usatgièrs, l’autre conselh assessor del Congrès, amassa de representants dels sectors de la transmission e de la difusion de la lenga, çò que permet d’associar e de prene en compte la demanda sociala.
Lo portal internet locongres.org, qu'a respondut d'en primièr als besonhs prioritaris dels usatgièrs, mai que mai per la lexicografia en linha, prepausa ara un espaci dedicat a las nòrmas e òbras normativas que serà progressivament crescut e enriquit.
Teni a mercejar totes los que trabalhan e trabalharàn per aquela rubrica, sòcis del Conselh lingüistic, Florença Marcouyre, lexicografa, Aura Séguier, administratritz del site, Benaset Dazéas, director del Congrès.
Gilabèrt Mercadièr, President del Congrès.
Nòrmas
- Nòrmas graficas e lingüisticas
- Tablèus sonòrs grafia-fonia
- Sistèma internacional d’unitats de mesura
Òbras normativas
