Swiftkey, clavèr predictiu en occitan taus telefonets

Swiftkey en occitan

Lo clavèr tà esmartfònes e tauletas de Swiftkey, ua societat de Microsoft, qu'ei d'ara enlà disponible en occitanAndroid.

Aqueth clavèr intelligent qu'a ua basa de mots en occitan e, mercés a la tecnologia predictiva, que perpausa a l'utilizator seguidas de mots en tot apréner deus messatges de l'utilizator.

Qu'avóm explics de Julien Baley, desvolopaire en çò de Swiftkey e autor de la version occitana.

Lo Congrès : SwitfKey, qu'es aquò ?
Julien Baley : Swifkey qu'ei un clavèr predictiu entaus telefonets e tauletas Android. Dab aqueste que's pòt picar mei viste, mei aisidament e en evitant las fautas, en la o las lenga(s) qui avetz causida(s). Lo noste atot màger : que suportam mei de 125 lengas !

LC : Perqué editar un clavèr occitan ? 
JB : Çò purmèr qu'èra un besonh personau : quan comencèi a apréner lo breton quauquas annadas a, non i avè pas cap de clavèr tà l'escriure e, mei maishant, pas cap de clavèr permetent prediccions tad aquera lenga. Pr'amor que tribalhavi dejà en çò de Swiftkey, qu'aví la bona posicion tà cambiar la situacion e que'm gahèi a la creacion d'un clavèr entau breton.

Quan comencèi a apréner l'occitan quauques mes a, que m'avisèi de tira que la lenga avè lo medish besonh e que m'apliquèi au tribalh. Que cau saber qu'en cinc ans d'existéncia publica deu noste clavèr, arrés ne ns'avè pas contactat tà que realizèssem l'occitan, n'anava pas arribar autament. Un conselh, doncas, si lo vòste logiciau preferit n'ei pas en occitan, contactatz l'enterpresa qui'u concep.

LC : Quin fonciona?
JB : Swiftkey qu'apren la faiçon dont los mots e's segueishen dens ua frasa, atau com la lor frequéncia. Quan picatz, lo clavèr que pòt predíser quau mot ètz a picar en se basant sus çò qui avètz dejà escriut, atau com suus mots precedents. Atau, com escrivetz « Cossí » au començament d'ua frasa, Swiftkey que sap de qu'ei probable que voletz escriure « Cossí anatz / Cossí vas / Cossí va... ».

Per'mor que lo clavèr e sap la faiçon corrècta (au sens de l'estandard ortografic causit) d'escriure los mots, que pòt corregir las pècas o v'ajudar dab los accents : per exemple ne s'ac vau pas que piqui los accents, que m'empari sus Swiftkey tad aquò har. En picant « Cossi voles », Swiftkey que predirà « Cossí vòles », per exemple.

LC : Quin l'installar?
JB : S'avetz un aparelh Android, anatz a la botiga d'aplicacion deu vòste aparelh (Google Play) e cercatz Swiftkey. L'aplicacion qu'ei completament a gratis e, hèita l'installacion, n'avetz pas qu'a seleccionar l'occitan dens la lista de las lengas perpausadas ; que's pòt installar dinc a 3 lengas, que's pòt donc utilizar, per exemple, l'occitan, lo francés e l'anglés dab lo quite clavèr !

Sustot que'n cau parlar au vòste entorn. S'i son hèra a l'utilizar, que justificar mei que s'aucupan de las lengas ditas minoritàrias.

  • Tà installar Swiftkey au vòste telefonet :

Teledescargar a Google Play