La Durangoko Azoka qu'ei un salon deu libe e deu disc bascos qui amassa cada an mei de 100 000 visitaires. Augan, tà la 49au edicion deu salon qui's debanè deu 5 au 8 de deceme, los organizators qu'envitèn la cultura occitana au parat de divèrs eveniments : taulas redondas, conferéncias e presentacions publicas, intervencions sus la literatura e lo desvolopament numeric occitan.

L'InÒc Aquitània qu'i convidè Lo Congrès e OCtele : Bernat Arrous, sòci deu conselh lingüistic deu Congrès, qu'animè dab Xarles Videgain (Euskaltzaindia) e Joachim Gorrotxagi (Universitat deu País Basco) ua conferéncia arron lo contacte entre la lenga occitana e la lenga basca. Ací que'n podetz teledescargar la presentacion.

Benaset Dazéas (director deu Congrès) e Igor Leturia (director-projècte d'Elhuyar) que hasón ua presentacion de las lors collaboracions : diccionari basco-occitan, còrpus textuau occitan, estudi tau desvolopament numeric occitan. Qu'estó seguit per ua presentacion deu portau numeric deu Congrès per Aura Séguier, webmestressa deu site.

Enfin Lo Congrès, l'InÒc Aquitània, l'Institut culturau basco e Azuke Fundazioa que participèn a ua taula redona suus utís numerics tà la promocion de las culturas basca e occitana.

L'album fòto de l'eveniment :