Examèn de la Jurada APRENE-Calandreta
APRENE, l'establiment d'ensenhament superior occitan que forma los futurs regents de Calandreta, organiza la Jurada en junh venent. Aqueste examèn per integrar la formacion se debanarà en dos temps : un escambi oral e una jornada de produccion d'escrits.
Amassada deu burèu deu Conselh deus usatgèrs
Lo burèu deu Conselh deu usatgèrs que s'amassè lo 28 de heurèr dens los navèths locaus deu CFPO Mieidia-Pirenèus au quartièr Sent Anha de Tolosa.
Las expressions occitanas de Carnaval
A la demanda d'organizators deu Carnaval Biarnés (qui's debanè a Pau deu 22 de heurèr au 4 de març), Lo Congrès que realizè ua campanha de comunicacion arron las expressions occitanas de la hèsta. Atau qu'estón hèitas afichas, vedederas au capitèth de la Hauta Planta – e tanben suus hialats sociaus - pendent las temporas de Carnaval, dab expressions bearnesas : Hà's crebar lo borràs (minjar de tròp), Anar en dondèna (anar a la hèsta), Har deu palhassa (har lo bofon)...
Lo Capuleton roi
Letras d'Òc que sòrt de publicar duas arreviradas en occitan deu Petit Chaperon rouge de Charles Perrault. La version gascona que's ditz Lo Capuleton roi e la version lengadociana que s'intitula Lo Capaironet roge.
Tot en un (tresena version)
IEO Edicions ven de far paréisser la tresena edicion, corregida e aumentada, del diccionari Tot en un. Aqueste diccionari occitan-francés e francés-occitan en varianta lengadociana conten 70 000 dintradas.
L'InÒc Aquitània qu'a lo labèl « Ethnopôle »
L'InÒc Aquitània qu'ei estat labellizat « Ethnopôle » peu Ministèri de la Cultura e de la Comunicacion. Aqueth labèl nacionau qu'ei balhat a ua institucion qui òbra aus nivèus regionau e nacionau en mestior de recèrca, d'informacion e d'accion culturau.
La bòria delh Bestial
Lo roman celèbre Animal Farm (« La Ferme des animaux » en francés) de George Orwell a ara sa revirada en occitan per Joan D. Ros. D’avora enlai podretz legir en lenga nòstra aquelh conte filosofic sobre la revòlta de las bèstias d'una bòria.
Diccionari occitan-francés de l'arquitectura
Thierry Verdier a publicat a las Éditions de Paris un diccionari occitan-francés dels tèrmes d'arquitectura. Recampa mantun centenat de tèrmes tecnics reculhits dins las sorsas escritas de Lengadòc e de Roergue dempuèi lo sègle XVI.
Aprener l'occitan amb Assimil
Un metòde Assimil per aprene l'occitan ven de sortir. Es estat realizat per Nicolas Quint e publicat amb lo sosten de la DGLFLF. S'adreça als començaires e als falses començaires.
Desvolopatz un supèr poder
« Desvolopatz un supèr poder » es l'eslogan d'una campanha del CIRDÒC per promòure los novèls corses d'occitan que prepausa en partenariat amb lo CFPO. Se debanan cada dijòus de 17 h 30 a 19 h 30 dempuèi lo mes de març. Fins al 26 de junh, los participants i poiràn apréner l'occitan d'un biais dinamic en alternant los talhièrs de lenga e los de cultura. Practicaràn atal la lenga en encontrant de musicians, de comedians, de professionals e d'ensenhaires.
Crida a comunicacions : Legir Frederic Mistral
A l’ocasion dau centenari de la mòrt de Frederic Mistral, la còla de recèrca LLACS (Lengas, literaturas, arts e culturas dei suds) vòu organizar un collòqui a l'entorn de l'autor lei 20 e 21 de novembre. Manda doncas una crida a comunicacions.
Faulas de La Fontaine
Dos gals vivián en patz qu'ei un recuelh de 40 faulas de Jean de la Fontaine arreviradas en occitan lengadocian. Qu'i trobaratz per exemple La lèbre e la tartuga, La granolha que se vòl far tant gròssa que lo buòu, Lo lop e l'anhèl, La cigala e la formiga...
Entraïnament a la Dictada occitana
Lo 25 de genièr, la Dictada occitana se farà dins mantunas vilas d'Occitània. Per vos i preparar, la mediatèca numerica Occitanica vos prepausa de vos entraïnar amb de tèxtes inedits legits per sièis autors contemporanèus : Josiana Ubaud, Alan Roch, Joan Ganhaire, Didier Tousis, Fabrici Bernissan e Danís Chapduèlh.
Bona annada !
Bona annada, urosa e granada per vosautres, los vòstres e la nòstra lenga ! Que l’an novèl vos faga lo camin bèl !
L'InÒc que desira la bona annada en occitan
Com tots ans, l'InÒc Aquitània que s'i torna dab la soa campanha d'afichatge « Bona annada ». Com tots ans, la lenga occitana que serà atau socializada mercés a un messatge simple e amistós, lo deus vòts de la bona annada.
Partenariat entre lo CIRDÒC e lo COMDT
Lo COMDT, Centre occitan de las musicas e danças tradicionalas, e la mediatèca occitana del CIRDÒC an decidit de perlongar lor partenariat per l'annada de 2014. Aquel pertòca la mediatèca numerica Occitanica.
L'occitan es tornat al Salon de la qualitat alimentària
Lo SISQA, Salon internacional de la qualitat alimentària de Tolosa, s'es debanat del 12 al 15 de decembre. Mercé a la còla del labèl Òc per l'occitan, la lenga occitana i èra tornamai plan presenta.
Numèro 73 de la revista « Lengas »
Lo numèro 73 de la revista de sociolingüistica Lengas qu'ei d'ara enlà en linha suu site openedition. Lo sostítol d'aqueth numèro de 2013 qu'ei « Lexicografia, oralitat e politica lingüistica en occitan – plurilingüisme en Soïssa ».
Les mots des occitans
Les mots des occitans de Michel Piquemal, publicat a las Edicions del Cabardés, es un obratge de 68 paginas illustrat que fa omenatge a la lenga occitana.
Ièrbas bordas deras Pireneas
Aqueth document que balha eths noms gascons de las èrbas arrecuelhuts enas vaths deth Coseran, deth Comenge, d’Aran, de Bigòrra e Bearn.
Quin occitan per deman ? Lengatge e democracia
Eric Fraj publica en cò de Reclams aquel ensaj sus l'ensenhament e la transmission de la lenga occitana uèi e sus lor avenidor.
La Region Auvèrnhe signa la Carta interregionala
Per una conferéncia de premsa que se tenguèt en novembre passat, lo president de la Region Auvèrnhe anoncièt doas avançadas màgers per la politica lingüistica de la region. En promièr, s'engatgèt de botar en plaça una convencion amb lo rectorat de Clarmont, entre la dintrada de 2014, sobre l'ensenhament de l'occitan. Anoncièt amai la signatura de la Charta de cooperacion interregionala e transfrontalèira pelh desvolopament de la lenga occitana.
ÒC tele, la purmèra television en occitan
Lo 20 de deceme de 2013 que s'aviè Òc tele, la purmèra cadena de television tota en occitan. Ad aqueth parat qu'estó enregistrat ua emission en dirècte a l'Ostau de Region Aquitània