Lo Congrès permanent de la lenga occitana e lo laboratòri CLLE-ERSS (CNRS / Universitat Tolosa-Jean-Jaurés) qu'avièn ua associacion qui a per mira la creacion d'un lexic obèrt de las fòrmas flechidas de l'occitan (LOFlOc).
Aquera iniciativa que's hè dens l'encastre de Restaure (Ressorsas informatizadas e tractament automatic entà las lengas regionaus), un projècte ANR (Agéncia nacionau de la recèrca) qui ved a s'associar CLLE-ERSS (Universitat de Tolosa), LESCALP (Universitat d'Amiens) e LILPA (Universitat d'Estrasborg) a l'entorn deu desvolopament de las ressorsas informaticas e de las atrunas de tractament automatic entà tres lengas regionaus de França : alsacian, occitan e picard.
Dens la seguida deu Morphalou entau francés o deu Lexic Obert Flexionat de Català, Lofloc que serà un lexic de las fòrmas flechidas d'un lèma, a saber ua basa lexicau monolingua a on cab ua lista de mots occitans dab la categoria gramaticau (tipe, genre, nombre, etc.), las fòrmas flechidas (feminin, plurau, conjugason, etc.) e la varietat.
Inscrivut au demiei deus desvolopaments prioritaris de la huelha de rota de desvolopament numeric de l'occitan, Lofloc qu'ei ua ressorsa indispensabla a l'anotacion deus còrpus textuaus, mes tanben a la creacion d'aplicacions numericas taus com la sasida predictiva e la correccion ortografica.