Crèdits e mercejaments

Lo numeric occitan que s'ei desvolopat d'ua faiçon generau en darrèras : contienguts enciclopedics (Wikipèdia), patrimòni (Occitanica), médias (OCtele), hialats sociaus que son autant de sectors d'ara enlà investits. Totun la lenga occitana que pateish tostemps d'un important retard numeric dab per consequéncia ua abséncia quasi totau dens atrunas d'ara enlà correntas (burotica, telefonia mobile, etc.). La pregnança creishenta d'aqueras tecnologias en la vita vitanta (tribalh, desplaçaments, consum, educacion, vita sociau) que hèn de las tecnologias deu lengatge un factor mei de marginalizacion entà ua lenga dejà minorizada.

Aqueth fenomèn qu'ei berói descrivut e analisat dens un estudi realizat per META-NET, un hialat de recèrca amassant diferentas institucions, universitats e centres de recèrca e dont la mission principau ei la mesa en plaça de fondacions tecnologicas solidas entà ua Euròpa multilingua. Lo son Libe blanc que hè un estat actuau de las ressorsas e tecnologias deu lengatge entà trenta lengas europèas dens sheis maines (la traduccion automatica, la sintèsi e la reconeishença vocaus, la correccion ortografica, l'analisi semantica, l'analisi gramaticau e la generacion automatica de tèxte) e que perpausa tanben ua grasilha comuna de classificacion e d'evaluacion de las ressorsas e atrunas numericas. Los resultats de l'estudi que son particularament inquietants : los editors que soslinhan l'escart creishent enter las lengas « granas » e « petitas », qu'ei indispensable d'equipar totas las lengas (dont las mei petitas e las mensh dotadas) de las tecnologias de basa necessàrias, sinon aqueras lengas be'n son condemnadas a « l'extincion numerica ».

Entad aquò har, l'estudi que preconiza la creacion massiva de dadas, la mutualizacion au nivèu europèu, lo transferiment tecnologic enter las lengas, l'interoperabilitat de las ressorsas, de las atrunas e deus servicis.
Dens aqueth encastre lo Congrès, dab l'ensemble deus sons partenaris scientifics e institucionaus, qu'a engatjat mantun programa de desvolopament de las tecnologias lengatgèras entà l'occitan : en 2014 qu'ei redigida la Huelha de rota de desvolopament numeric l'occitan, un document quadre pluriannau de planificacion de las òbras, que serà seguit de mantun programa operacionau (traductor automatic, sintèsi vocau, reconeishença vocau, clavèr predictiu, còrpus, etc.).

La Farga qu'ei lo portau collaboratiu TAL (tractament automatic de la lenga) entà l'occitan. Qu'auratz accès a l'ensemble de las ressorsas existentas gràcias a l'inventari de las ressorsas, que poderatz telecargar las atrunas (modules/plug-in), entrar en contacte dab la comunautat e har conéisher los vòstes projèctes.

Gràcias a diferentas iniciativas, que s'ei vist a paréisher en darrèras ressorsas e atrunas numericas hèra utilas entà l'occitan dens mei d'un maine : patrimòni, contienguts enciclopedics e lexicaus, òbras universitàrias, audiovisuau, etc.

Totun, que's constata que la lenga be pateish enqüèra de retards deus bèths : logiciaus entau gran public, hialats sociaus, jòcs videos o enqüèra telefònes intelligents que son autant d'enjòcs cruciaus entà la transmission de la lenga – sustot entà las generacions navèras ; l'obrador qu'ei immense.

Qu'ei pr'amor d'aquò que lo Congrès, dab lo sostien de l'ADEPFO (Associacion de desvolopament deus Pirenèus per la formacion) que decidí de miar ua afranquida inedita a l'entorn de la question deu numeric occitan.

Atau un vintenat de personas representativas de l'usatge sociau de la lenga (ensenhament, formacion, institucions, Universitat) que realizèn un estudi de ueit mes dab l'ajuda de dus organismes d'Euskadi : la societat de formacion Media.kom e la fondacion Elhuyar. Qu'encontrèn tanben especialistas de las tecnologias deu lengatge entà las lengas basca, catalana, bretona e galesa.

L'objectiu que n'èra la produccion d'un document-quadre qui ei bitara perpausat a las collectivitats partenàrias entà que sia integrat e mes en òbra dens l'encastre de las politicas lingüisticas publicas. Aqueth document que hè purmèr un diagnostic deu numeric occitan dab un inventari de çò d'existent (diccionaris en linha, correctors ortografics, etc.) e qu'estableish apuish ua lista deus besonhs en atrunas e ressorsas : traductors automatics, clavèrs predictius entaus telefònes intelligents, etc.

Dens l'encastre de l'espandiment de la Huelha de rota de desvolopament numeric de l'occitan, lo Congrès qu'engatgè mantun programa operacionau :

• LINGUATEC, un programa europèu (hons FEDER) de desvolopament e de difusion de navèras ressorsas, atrunas e aplicacions lingüisticas innovantas entà l'aragonés, lo basco e l'occitan.
• ReVOc, un programa dedicat de la tecnologia de reconeishença vocau.
• Lo transcriptor automatic, ua atruna permetent lo sostitolatge automatic de videos.
• Lo lexic obèrt de las fòrmas flechidas de l'occitan (LOFlOc), ua ressorsa TAL de basa necessària a de nombrós desvolopaments.
• Lo formatatge TEI (Text Encodage Informacion) deus lexics e deus córpus deu Congrès, entad ac har interoperable, entà desvolopar atrunas e ressorsas navèras.
• ROLF (Ressources outils langues de France), un programa de desvolopament de clavèr predictiu Android entà l'alsacian, l'occitan e lo picard.
• Lo Congrès qu'engatgè ua associacion dab lo C.N.R.S. entà l'interconnexion de las soas dadas lexicograficas dab lo Thesoc.
• La futura platafòrma lexicau, textuau e toponimica que permeterà de perpausar aus usatgèrs ua infrastructura numerica de punta.

Lo projècte Còrpus del Congrès qu'a per tòca la constitucion d'un ensemble de còrpus entau desvolopament d'utís de tractament automatic deu lengatge. Qu'a l'objectiu doble de quantitat (entà poder entrainar intelligéncias artificiaus) e de representativitat de la diversitat de l'espaci lingüistic occitan. Los sons tèxtes que'n son formatats segon los estandards deu Congrès de la nòrma TEI.

Mei de 60 partenaris que hornín dadas entà bastir aquera ressorsa bèra. Mèdias, editors, organismes de formacion, institucions, particulars, associacions culturalas... que transmetón au Congrès contienguts tant variats com libes, emissions de ràdio e de television, vidzos sostitoladas, articles de premsa, contiengut de sites web, compte renduts o documents de comunicacion... Ad aquò que's horní mantun contiengut libre de dret (Wikipèdia, traduccions de logiciaus libres...). Las dadas que vienen de tot lo territòri e que son tant escriutas com oraus.

A l'òra d'ara, que i caben dens la basa deu projècte Còrpus :

• Un còrpus monolingüe de mei de 8,5 milions de mots
• Un còrpus parallèle occitan-francés de mei d'un milion de mots
• Petits còrpus parallèles de l'occitan de cap a d'autas lengas, per un totau de mei de 300 000 mots
• Un còrpus audio alinhat de mei de 250 òras per quasi 1,5 milion de mots

Los còrpus audio e escriut que serveishen a entrainar l'intelligéncia artificiau deu futur utís de reconeishença vocau dens l'encastre deu projècte ReVoc. D'uns soscòrpus qu'estón tanben hargats entà testar lo traductor automatic Revirada e seleccionar frasas a enregistrar entà la sintèsi vocau Votz.

Lo Congrès permanent de la lenga occitana qu'ei portaire d'un programa d'accion dens l'encastre deu CPER 2021-2027 entà las regions Novèla Aquitània e Occitània : que s'i parla d'un projècte d'infrastructura numerica dedicada a la lenga occitana, permetent de crear, estructurar e religar diferentas ressorsas lexicograficas, textuaus e toponimicas a l'entorn d'ua interfàcia de consultacion publica, d'un nivèu d'excelléncia comparabla a la deu Centre nacional des ressources textuelles et lexicales entà la lenga francesa (https://www.cnrtl.fr). Que son presvists peu programa diferents chantièrs, dont la redaccion deu Diccionari generau informatizat de la lenga occitana (DGILO), la restauracion de la toponimia occitana (en aliança dab l'IGN) sus las duas regions e lo tractament massiu de las dadas a l'estandard TAL (tractament automatic de las lengas).

Lo programa qu'a per objectiu de produsir atrunas numericas, d'utilizacion gratuita e libra per ordenadors e aparelhs connectats mobiles, entà difusar la transmission e l'usatge d'ua lenga occitana de qualitat.

Aquesir ressorsas lingüisticas qui permeten la difusion e l'estudi d'ua lenga de qualitat

• la realizacion d'un Diccionari generau informatizat de la lenga occitana (DGILO). Tot parièr que las soas lengas vesias catalana e basca, l'occitan que serà atau dotat d'un diccionari descriptiu complet, cobrant totas las varietats de l'occitan, dab descripcion fonologica, exemples, dísers, arreproèrs, citacions literàrias. Que s'ageish d'un tribalh de mantua annada, a qui harà mestièr ua equipa hornida dens lo maine de la lexicografia, qui aurà ua edicion numerica qui permeterà la soa mei grana difusion gràcias aus estandards d'interoperabilitat. Que's poderà pensar après a ua edicion papèr en mantun volume. Aquera òbra academica de prestigi qu'ei indispensabla a la coneishença e a la difusion de la lenga. Despuish lo Tresaur dóu Felibrige de Frederic Mistral, arrès n'a pas produisit nada òbra lexicografica panoccitana d'aqueth nivèu scientific e d'aqueth endom.

• l'aumentacion de la basa deu multidiccionari Dicodòc sustot peus diccionaris seguents : lo Vayssier, lo Mouly e l'Alibert e lo lor formatage, en TEI entà perméter (adarron) lo desvolopament de numerosas aplicacions lingüisticas (diccionari de las expressions, ...)
• Aumentacion de las basas textuaus occitanas anotadas (dadas morfosintaxicas) qui cobreishen la diversitat de la lenga (en varietat e en genre literari) dab interfàcia de consultacion. En foncion deus partenariats establits, aquera operacion que serà eventuaument totaument o parciaument fusionada dab lo programa BaTelÒc e ParcoLaf deu laboratòri CLLE-ERSS (CNRS/Universitat Tolosa 2). 

Objectius : 10-25 milions de mots entau còrpus monolingüe, 2-5 milions entau còrpus bilingüe.

Restaurar, descríver e difusir la toponimia occitana en Regions Novèla Aquitània e Occitània (en partenariat dab l'IGN) :

Ua convencion qu'estó signada enter lo Congrès permanent de la lenga occitana e l'IGN (Institut Geografic Nacionau). Lo Congrès qu'ei d'ara enlà lo referent de l'IGN entà l'occitan sus l'armonizacion de las fòrmas graficas suus 32 departaments occitanofònes. Après lo País basco e Catalonha, Occitània que profieitarà atau d'ua mesa en valor, tant au nivèu nacionau com locau entad aqueth projècte d'endom. Pr'amor de constrentas de temps e d'espaci, las òbras engatjadas n'auràn pas lo nivèu de precision deus sons predecessors basco e catalan.

"Un programa ambiciós de restauracion de la toponimia occitana"

• Enquèstas de terren : collectatge orau auprès de locutors de lenga mairau occitana e ua enquèsta escriuta qui consisteish a relhevar un minimum de fòrmas ancianas dens las cartas (IGN, cadastre, canton, etc.) e dens las honts ancianas (libes terrèrs, bulletins parroquiaus, etc.).
• creacion d'un modèle de ficha d'identificacion necessària a la descripcion precisa (coordenadas geograficas, tipologia, data e lòc deu collectatge, honts relhevadas, fòrmas istoricas, etc.) de cada toponime occitan.
• Constitucion d'ua basa de dadas toponimicas dab ua API (Application programming interface) qui permet ua espleitacion entà ua recèrca multicritèri, accès per cartografia, etc.

Crear ua platafòrma numerica universau e multivarietats 

Que serà dedicada a las dadas lexicograficas, textuaus e toponimicas occitanas, equivalent occitan deu portau lexicau francés deu Centre nacionau de ressorsas textuaus (www.cnrtl.fr). Desvolopat en ligam dab La Farga, futura platafòrma collaborativa d'accès, de valorizacion, de desvolopament e d'escambi de las ressorsas TAL (tractament automatic de lenga) e informatica en occitan, lo portau que serà evolutiu e desvolopat segon los darrèrs estandards en tèrmes de formatatge, d'accès e d'interoperabilitat :

"Ua interfàcia modèrna impulsada per tecnologias de punta"

• Barra de recèrca unica, en occitan o en francés, permetent ua consultacion de las ressorsas locongres.org e CLLE : flexions, sinonimia, illustracion sonòra, traduccion, definicion, conjugasons, citacions en contèxte, rimas, contèxte dens los diccionaris istorics (gràcias a un adaptador de grafia), toponimes (descripcion e cartografia).
• Ensemble de las dadas formatadas en TEI, permetent l'interoperabilitat de las ressorsas e ua ergonomia optimau dab accès instantanèu (cada mot que serà “clicader”). D'uas APIs que permeteràn un accès a distància d'aqueras dadas cap a platafòrmas o aplicacions autas.
• Interrogacions de dadas extèrnas per las APIs : IGN (cartografia), Wikipédia (enciclopèdia), Occitanica (documentacion), etc.
• Interfàcia multiplatafòrmas « responsive », dab un suenh particular entà un accès per terminaus mobiles.

Ua purmèra edicion publica de la platafòrma, dab las varietats lengadociana e gascona, qu'ei projèctada per 2024, la version completa que serà editada en fin de programa.

ROLF qu'ei ua associacion enter lo Congrès permanent de la lenga occitana, CLLE-ERSS (CNRS/Universitat Tolosa Joan Jaurés), Abitar lo monde (Universitat d'Amiens) e LiLPa (Universitat d'Estrasborg) sostienut dens l'encastre de l'aperet a projèctes « Lengas e numeric » de la Delegacion generau a la lenga francesa e a las lengas de França-ministèri de la Cultura e la Comunicacion.

Aqueth projècte que s'inscriu dens la continuitat deu projècte ANR RESTAURE (Ressorsas informatizadas e tractament automatic entà las lengas regionaus) dens l'encastre deu quau mantua ressorsa e atrunas de TAL (Tractament automatic deu lengatge) que son desvolopadas entà tres lengas de França : alsacian, occitan e picard. Las realizacions deus objectius de RESTAURE que son en bona via. Aquò dit, los desvolopaments qu'estón estats realizats de faiçon concertada mes independenta entà las tres lengas. L'idèa qui sosten la presenta proposicion qu'ei de definir entà las ressorsas lexicaus un format unic qui permeteré de crear lo medish tipe de ressorsa entà las tres lengas, de perpausar ressorsas dont lo format e las anotacions e serén identics (dab per exemple los medishs jòcs d'etiquetas entà las categorias similaras dens las diferentas lengas), e d'aver atrunas d'ajuda a la creacion d'aqueras ressorsas qui serén partatjats entà las tres lengas.

Los desvolopaments qu'estón realizats de faiçon concertada mes independenta entà las tres lengas dab l'objectiu de la creacion d'un lexic de fòrmas flechidas entà cadua d'enter eras. L'idèa qui sosten la presenta proposicion qu'ei de religar los lexics de cadua de las tres lengas enter eths en utilizant lo francés com lenga pivòt e de desvolopar formats comuns entau desvolopament mutualizat de ressorsas e d'atrunas.

Gràcias au desvolopament concertat entad aqueras tres lengas, que's podó perpausar au gran public gran ua purmèra version en occitan deu clavèr predictiu (prevista per la Huelha de rota de desvolopament numeric de l'occitan pilotada peu Congrès), mes tanben en alsacian e en picard.

Lo projècte Lexics qu'a la tòce de formatar en XML (segon la nòrma TEI) tots los diccionaris, lexics especializats, basas toponimicas, lexics flexionaus deu Congrès e deus sons partenaris. Aqueths lexics formatats que pòden apuish estar integrats dens atrunas de TAL (corrector ortografic, traductor automatic, clavèr predictiu) o emplegats entà generar automaticament o semiautomaticament ressorsas autas (diccionaris de sinonimes, diccionaris de rimas, diccionaris de locucions...).

La redaccion de la huelha de rota de desvolopament numeric de l'occitan, en 2014, que soslinhè lo besonh entaus actors deu TAL occitan de dispausar de dadas estandardizaderas e interoperablas. Lo Congrès qu'aviè donc aqueste projècte qui a per mira de har vàder los sons lexics compatibles dab las soas autas ressorsas (com los sons lexics, qui son eths tanben formatats en XML-TEI) e las deus sons partenaris.

Lo formatatge que hè vàder legederas las ressorsas per las maquinas tanben. La nòrma TEI (Text encoding information) qu'ei un format de balisatge entau lengatge XML (Extensible Markup Language). Que permet, gràcias a balisas, d'indicar la natura de cada element d'un tèxte (mot, frasa, morfèma...). Atau, las maquinas que pòden conéisher la natura de cada element d'ua entrada. Per exemple, que saben quau ei lo mot-vedeta, quau ei la soa traduccion, quau ei la categoria gramaticau de la soa traduccion... Aquerò que permet de generar automaticament navèras ressorsas en tirar solament çò qui hè besonh, per exemple un mot e lo son femenin entà bastir un lexic de fòrmas flechidas, un mot e la soa traduccion entà bastir un lexic entà un traductor automatic...

Lo projècte Lexics que permetó de desvolopar ressorsas entà mantua atruna deu Congrès :

• Lo traductor automatic Revirada
• Lo fonetizaire emplegat per la sintèsi vocau Votz
• Los clavèrs predictius e correctors ortografics Dicodòc
• Daubuns diccionaris deu Dicodòc : locucions, sinonimes
• Laboratòri, l'atruna de consulta avançada de lexics occitans

Tà'n saber mei tà çò de la nòrma TEI emplegada peu Congrès.

Dens l'encastre de l'aperet a projèctes 2021 de l'Euroregion Novèla Aquitània/Euskadi/Navarra, qu’estó retiengut lo Congrès dab dus partenaris bascos, las fondacions bascas Elhuyar e Euskokultur, entà un programa triennau de desvolopament de transcriptor automatic de video enter las lengas occitana, basca, francesa e espanhòla. Que s’i parla de desvolopar un transcriptor automatic de la paraula en occitan e en las divèrsas lengas parladas en Navarra (basco e espanhòu). Concrètament, la tecnologia que permeterà, a partir d'ua video enregistrada, de tirar e de transcríver la votz, de l'arrevirar (en foncion deus parelhs de lengas disponibles), puish de generar e d'integrar automaticament sostítols dens la video. A la sortida, que s'obtienerà automaticament ua video dab lo son originau e ua revirada sostitolada.

Sòcis tecnics

Dab lo sostien de

La reconeishença vocau qu'ei l'utís qui analisa la votz e qui la transcriu dab la fòrma d'un tèxte escriut. Que hè partida de las tecnologias de tractament de la paraula qui permeten aus umans d'escambiar oraument dab las maquinas, mercés a interfàcias vocaus.

La reconeishença vocau qu'ei indispensabla tà realizar utís com lo sostitolatge automatic de video, las aplicacions de dictada vocau o los assistents personaus intelligents.

Lo Congrès permanent de la lenga occitana que participa a un programa transfronterèr triennau dab lo prètzhèit de dotar l'occitan (tà las soas varietats gascona e lengadociana) d'aquera tecnologia.

Que tribalha en partenariat dab Rolde de Estudios Aragoneses (qui desvolòpa la medisha tecnologia entà la lenga aragonesa), la fondacion basca Elhuyar (en carga de la partida tecnica deu programa) e mei d'ua estructura qui produseishen contienguts multimèdias en occitan.

Perqué la reconeishença vocau en occitan ?

Las tecnologias de la lenga – reconeishença vocau, sintèsi vocau, traduccion automatica o enqüèra analisi semantic – que son un enjòc vitau entà las lengas minorizadas. Entà projectà's de cap a ua societat mei anar mei numerizada, aquestas qu'an de dispausar de ressorsas e apèrs de qui cau entà que los locutors escàmbien en la lor lenga pròpia peu mejan d'interfacis. Mei d'un programa qu'estón realizats en aqueth sens entà la lenga occitana : Linguatec (traduccion automatica e sintèsi vocau), BaTelOc (basa textuau occitana), ROLF (clavèrs predictius).

La reconeishença vocau que permet la transcripcion de la votz en tèxte, ua tecnologia qui ei d'ara enlà difusada en abonde en aplicacions gran public, notadament peus assistents personaus (Siri d'Apple, Google Home o enqüèra Alexa d'Amazon entaus mei coneishuts) e tau sostitolatge automatic de video. 

Exemples d'utilizacion de la reconeishença vocau

La platafòrma de contribucion

Entà atraçar ua quantitat bèra d'enregistraments transcriuts, e qui sian representatius de la diversitat deus locutors de l'occitan, Lo Congrès que desvolopè un utís de contribucion tà la comunautat. Sus aquera platafòrma, cadun que pòt enregistrar frasas qui seràn ajustadas au còrpus bastit dab los partenaris.

La reconeishença vocau, com fonciona ?

La reconeishença vocau qu'utiliza l'intelligéncia artificiau (los hialats neuronaus) tà transcríver automaticament la votz en tèxte escriut.

Abans d'ac poder har, que hè besonh d'entrainar l'IA dab frasas audio dejà transcriutas. Que hè doncas besonh un bèth còrpus audio transcriut, qu'ei a díser ua quantitat bèra de tèxtes dab los enregistraments audios correspondents.

Que cau tanben « har pèisher » la maquina dab còrpus bèth de tèxte e sonque. Atau que pòt apréner quaus fòrmas e son frequentas, quau mot apareish sovent a costat de tau aute...

Enfin, desvolopar que cau mei d'un programa :

• Un tà passar en letras los nombres, los simbèus, las abreviacions, las unitats de mesura... abans de balhar un tèxte a la maquina.
• Un « abreviator » qui hè lo contra, tà har mei legeders los tèxtes prepausats aus utilizators.
• Un fonetizaire tà obtiéner la prononciacion en alfabet fonetic internacionau d'un mot.
• Un programa tà aver tots los mots qui corresponen a ua prononciacion.

Las etapas de l'entrainament e de la transcripcion

Lo calendari

2020 : Definicion de las exigéncias, especificacions foncionaus e constitucion deu còrpus

Que's haràn en ua purmèra etapa las exigéncias tecnicas atau com las especificacions foncionaus.

D'un punt de vista tecnic, los desvolopaments entà l'occitan que seràn realizats en l'estat de l'art, a saber per l'utilizacion deus hialats neuronaus (intelligéncia artificiau). Ad aquesta tecnologia de tria que'u hè totun besonh un nombre hòrt important de dadas. Sonque un còrpus ric, voluminós e variat que guarantirà un resultat de qualitat en fin de cadena.

Entad aquò har, lo Congrès qu'a engatjat un partenariat dab mantuns productors de contienguts textuaus multimèdias en occitan : institucions, mèdias, editors, productors de contienguts audiovisuaus...

Qu'ei pr'amor d'aquò aquesta purmèra fasa que serà essenciaument consacrada a un tribalh de collècta, tractament (alinhament tèxte/son) e enterpausatge de còrpus textuaus e acostics per l'occitan. Que s'estiman a 200 òras haut o baish lo besonh de transcripcions e a 500 milions de mots lo còrpus textuau necessari per cada varietat. Pr'amor d'estar l'occitan ua lenga enqüèra tròp chic dotada, que compensaram per l'utilizacion de còrpus gigants deu francés e de l'espanhòu per obtiéner, mercés a la traduccion automatica, còrpus textuaus occitans importants.

2021 : Finalizacion e desvolopament tecnologic

Ua part bèra deu projècte que's harà ad aqueth moment : acabar la collècta de las dadas necessàrias, realizar tres deus quate lòts de tribalh mei tecnics entà arribar a ua version avançada deu desvolopament. Concrètament, que prevedem au mensh ua mesa en òbra avançada deus modules seguents :

• Creacion deu modèle lingüistic.
• Creacion deu modèle acostic.
• Desvolopament deu transcriptor.

2022 : Desvolopament finau e validacion

Dens la purmèra partida d'aquesta fasa darrèra, tots los desvolopaments tecnologics deu projècte que seràn acabats. La fasa de construccion deus transcriptors que serà tanben acabada. Integradas totas las compausantas tecnologicas, que seràn sosmetudas a ua seria de tèsts intensius d'avaloracion.

Los actors

Sòcis e sostiens

ReVOc qu'ei un programa navèth de desvolopament de la reconeishença vocau en occitan (varietats gascona e lengadociana) engatjat peu Congrès permanent de la lenga occitana. Aqueth programa triennau (2020-2022) que's debana dens l'encastre d'un partenariat transfronterèr qui assòcia l'institucion aragonesa Rolde de Estudios Aragoneses (qui desvoloparà la medisha tecnologia entà la lenga aragonesa) e la fondacion basca Elhuyar (en carga de la partida tecnica deu programa). Qu'a lo sostien financèr de la Region Novèla Aquitània, de la Region Occitània e deu Departament deus Pirenèus Atlantics (aperets a projèctes transfronterèrs).

Lo partenariat tà la constitucion deus còrpus

Tà entrainar l'intelligéncia artificiau, que cau quantitats granas de dadas. L'occitan, lenga dita « pauc dotada », n'a pas generaument aqueths ensembles de dadas. Tà constituir lo còrpus audio e lo còrpus textuau qui hèn mestièr au desvolopament de la reconeishença vocau, Lo Congrès non podè har-s'i solet.

Que's bastí doncas un partenariat d'ua pagèra inedita tà çò de l'occitan, tà constituir ua basa audio e textuau a la quau mei d'ua estructura e vienón portar la lor contribucion.

E tanben

• Miquèu Baris
• Bernat Bergé
• Danís Chapduèlh
• David Escarpit
• David Grosclaude
• Gérard Sabadel
• Lo Blòg Hadiu