Letra de ligason :

Sélectionnez votre langue

Jornada d'estudis Leon Còrdas

La còla de recèrca RedOc / LLACS organiza una jornada d'estudis e d'omenatge a Leon Còrdas lo divendres 22 de novembre. Se debanarà sul site Saint Charles a Montpelhièr a partir de 9 h.

La jornada se dobrirà amb la lectura d'un poèma de Felip Gardy consacrat a Leon Còrdas. A 9 h 30, Maria-Joana Verny farà una conferéncia titolada « Leon Còrdas, passaire de lenga e de cultura ». A 10 h, Yann Lespoux intervendrà sul tèma : « Quand l'occitanisme ensajava de lavar mai blanc. Leon Còrdas e lo projècte de lavariá de l'IEO (1951-1952) ». A 10 h 30, Felip Gardy vos prepausarà una passejada dins l'univèrs poetic de Leon Còrdas. A 11 h Miquèl Decòr farà una intervencion titolada : « La Respelida de Centelhas : (1960, Leon Còrdas). D'una cosmogonia a un mond novèl. D'un luòc mitic del Menerbés a un raconte poetic universal. D'una crida profetica a una renaissença umana e culturala ». La matinada s'acabarà amb una discutida.

A 14 h, Roy Rosten parlarà de « Trobadors uèi : lo poèta e sa translacion ». A 14 h 30, Clara Torreilles s'interessarà al Leon Còrdas romancièr testimòni. Puèi a 15 h, JC Forêt vos farà descobrir Leon Còrdas òme de teatre. Aquelas intervencions seràn seguidas a 15 h 30 d'una discutida.

De 16 h 30 a 17 h 30, i aurà una taula redonda amb Gisèle Pierra que parlarà del darrièr espectacle de Leon Còrdas, Patrici Baccou qu'intervendrà sus son rencontre amb l'òme, Patrick Albert (jos resèrva) sus la bibliotèca Leon Còrdas al collègi Calandreta, Michel Còrdas sus la mesa en scèna de Menèrbas 1209 (jos resèrva), Magali Còrdas que legirà qualques poèmas de l'autor e Joan-Frederic Brun que parlarà de Leon Còrdas en cèrca de la lenga ideala.

Enfin a 18 h, estudiants de l'Universitat de Montpelhièr interpretaràn tres poèmas de Leon Còrdas.