Qu'ei dab un gran tristèr qui aprenom la mort de Gilabèrt Nariòo lo 6 d'abriu passat...
Cronicaire, lingüista, traductor, qu'èra plan coneishut peu son engatjament associatiu en favor de l'occitan, notadament dab lo movement Calandreta, Ràdio País e lo jornau La Setmana.
Autor actiu deus edicions Per Noste, qu'avèva redigit au costat de Miquèu Grosclaude e de Patric Guilhemjoan, lo Diccionari francés/occitan (gascon), ua referéncia en matèria de lexicografia occitana qui los usatgèrs deu Dicodòc e coneishen plan, deu Repertòri de las conjugasons gasconas (tostemps dab M. Grosclaude) e de Parlar plan, un obratge realizat a partir d'ua cronica eponima de la revista País gascons dens la quau Gilabèrt Nariòo respon a las questions deus qui vòlen melhorar la lor lenga.